Zaninah MSL 9 Finals : Zarkawt BCA hmaah Khatla TBL

Mizoram Super League (MSL) season 9 hmawr bawkna chu khelh ṭan a ni dawn ta - MSL Finals Game 1 chu zanin dar 8:00 hian R. Dengṭhuama Indoor Stadium, Mualpuiah khelh a ni dawn.

Zarkawt BCA leh Khatla TBL ten nomawi an inchuh dawn, tualchhung basketball club ṭha pahnih inkhel hi Zonet chuan live-in a pe chhuak dawn, a hmuna en duh tan Mualpui lam pan mai tur a ni ang.

Season dang angin MSL Finals hi best of three series hmanga khelh tur niin, champoin tur chuan a tlem berah game hnih tal chak a ngai tihna a ni a, vawi khat khelh fuh hluai vanga champion ngawt theih a ni dawn lo tihna a ni.

MSL9 match hmasa lamah khan team pahnih hi an intawng a, vawi li champion tawh Zarkawt BCA hi 99-94 in an chak, hneh loh nei loin final hi an lut, vawi thum champion tawh Khatla TBL hian an hneh loh tawh hneh tumin an beih a ngai dawn.

Champion lai TBL

MSL hmasa pahnihah Khatla TBL an champion a, chumi hnuah Mission Veng Vikings rawn langin a hnu lam chu Zarkawt BCA chan a ni deuh reng, season hmasaah erawh TBL hian BCA hnehin nomawi an rawn chawi.

TBL hi MSL champion lai an ni satliah lo, tunah hian MBBA Season Opening leh MBBA Cup te an kawl khawm mek a, tualchhung basketball inelna nomawi hlu ho an kawl khawm mek.

TBL coach H. Lalhruaitluanga chuan, "Zep tur a awm lo, beisei angin MSL tir lam kan khel ṭha lo. Chutiang karah chuan club board lamin min thlawp tlat a, league round lama kan hneh loh Bungkawn LB hnehin final hial kan lut.

"Fans leh club thuneitu lamin min thlawpna hi nomawi hmanga chhanlet kan tum leh dawn," tiin Vanglaini a hrilh. Hruaia hian tualchhung basketball-ah tawnhriat a ngah tawh - Vikings leh TBL tana nomawi chawitu zingah a tel tawh a, a inringtawk hle.

TBL hian league round-a Bungkawn LB an hmachhawn ṭumin Vanlalṭhazuala a inhliam a, an captain hi semifinal an khelh match pahnihah a inlan lo - coach hian a dam thu sawi mah se final atan a khek niin a lang.

Hruaia chuan, "A inkhel dawn," tiin Ṭhazuala chungchang a sawi. Season hmasa an champion nana player ṭangkai hi a inlan a nih chuan Zarkawt BCA tana buaipui tham a ni leh dawn, a hmunawm dawn tih a sawi ngam.

Mizo hlang

Zarkawt BCA hian Emmanuel Malou an chhawr thei dawn lo, state pawn aṭanga an chah luh Malou-a hi chhungkaw chhiattawhna vangin an ramah a haw - BCA hian a hmun ruak luah tur dil mah se he thu buatsaih lai hian thuneitu lamin phalna an la pe lo.

Lalrina Renthlei, Zonunsanga, Lalnunpuia Renthlei leh Matthew Remthluanga Sailo te an nei a, tualchhung player a neih ṭhat tawk em avang leh an chakna hnar an nih ṭhin avangin Khatla TBL tan hmachawn an awlsam dawn chuang lo.

BCA coach Marc Lalthlamuana Sailo chuan, "Kan tualchhung player-te hi ka ringtawk em em a, an theihna en chuan rintlak tak an ni. Game erawh hriat lawk theih a ni lo a, champion ngei tumin theihtawp kan chhuah dawn a ni," tiin Vanglaini a hrilh.

Zarkawt team player ṭhate hi hun rei tak lo khel ho tawh, MSL nomawi pawh lo chawi fo tawh an nih avangin tawnhriat an nei ṭha tawk. Lalnunpui Renthlei (R-a) an neih belh a, an ṭhat zual phah hle.

R-a hi season kal laia player hmuhnawm bik zinga mi a ni. Hollow, Tuikual South leh Bungkawn LB tan khel tawhin MSL-ah tawnhriat a nei ṭha, tun ṭumah BCA player zinga point nei hnem pawl a ni mek - TBL lamin an veng uluk ang.

BCA coach a ṭawng fimkhur a, season hmasa khan Tetea hi assistant coach niin tawnhriat a nei - kuminah fimkhur takin a naute a khelhtir dawn tih a chiang - TBL coach Hruaia pawhin vannei zawk nih an tum thu a sawi, fans nei ṭha zawk nih a pawimawh dawn.