Manchester United an chak ve ta

Premier League match hnih a zawna an tlawm hnuin Manchester United an chak ve leh ta a, Inrinni zan khan an mikhual Everton chu 2-0 in an hneh - an goal khung hi penalty aṭanga lut ve ve a ni!

Old Trafford-a inkhelah United tan rawlthar ṭhangduang Alejandro Garnacho chuan minute 12-na lekah penalty a hlawh chhuak a, Everton captain James Tarkowski chuan ṭul lo takin a titlu.

United tan Bruno Fernandes chuan penalty hi goal-ah a chantir a, minute 36-naah penalty dang an hmu zui. Hei pawh kum 19 mi Garnacho hlawhchhuah tho a ni a, defender Ben Godfrey chuan ṭul lo tak thoin a titlu a, referee-in penalty spot a kawk.

Portuguese midfielder Bruno-a'n duhsak takin, tun hnaia sawisel tawk Marcus Rashford a kian a, English striker hian cool takin goal-ah a chantir. United an chak a, Erik ten Hag a nui ve leh thei ta.

Everton erawh an vanduai takzet - khualmualah vawi 23 zet shot an nei thei a, heng zinga paruk hi target-ah a kal. Mahse, fimkhur tawk loh vanga penalty vawi hnih an chawi chu an tlawmpui a, goal hmaa an hriam tawk loh rah an seng bawk.

Merseyside club tan hian Dwight McNeil, Jack Harrison, Amadou Onana, James Garner, Dominic Calvert-Lewin leh Lewis Dobbin ten goal khungna chance an nei vek a, an chhawr lo vek thung.