FIFA Santosh Trophy : A vawi sarih nan Services an champion
77th National Football Championship for Santosh Trophy final-ah Services chuan Goa 1-0 a hnehin an champion a, goal awmchhun hi Services defender Shafeel PP khung a ni.
Nomawi zawnna hi March 9, Inrinni zan khan Golden Jubilee Stadium, Yupia-ah khelh a ni a, mipui 15,000 chuang an pungkhawm - stadium an khat vek. Arunachal Pradesh mipuiin Santosh Trophy hi an hlut a ni ringawt lo a, team 12 telna final round hi ṭha takin an thleng.
Final-ah hian Arunachal Pradesh chief Minister Pema Khandu, AIFF president Kalyan Chaubey leh AIFF hruaitute an tel a; Mizoram aṭangin LV Lalthantluanga (AIFF Finance Committee) leh Lalrengpuia (AIFF Futsal Committee) te an tel bawk.
A hunah Shafeel
Services hian final-ah defender rinrawl Zothanpuia (Thangpuia) an chhawr thei lo a, hei vang hian Shafeel kutah mawhphurhna a innghat nasa lehzual. Shafeel hian final round match hmasa bera Meghalaya an hmachhawn ṭumin injury time-ah penalty aṭangin goal awmchhun a khung a, quarterfinal-a Railways an hneh ṭumin penalty aṭang bawkin goal hmahruai a khung.
Semifinal-ah Services hian Mizoram an hneh a, injury time-ah Shafeel hian goalline aṭangin Malsawmfela tauh luh tur a dang. Shafeel hi Services tan tlarhnungah a pawimawh a, tlarhma a pui nasa bawk.
Final inkhel nung takah Shafeel hian box pawn aṭangin minute 67-naah chakna goal ṭha zetin a khung a, Goa goalkeeper Antonio Inacio da Silva dem theih a ni lo.
Goa hian group stage-ah Services hi 2-1 in hneh mah se final boruak sangah erawh goal an khung thei lo. Chutihrualin Goa ho goal bawh a na a, hun tawp lamah Thangpuia tel lohna Services tlarhnung a nghing nasa. Mahammad Faheez leh Joshua D'Silva ten chance ṭha nei bawk mah se best goalkeeper atana thlan Sayad bin Abdul Kadir chet ṭhat zan a nih miau avangin Goa-in goal an khung lo a, Services 1-0 in an chak.
Thangpuia tan kum ṭha
Mizo tlangval Thangpuia'n final khel lo mah se Services champion-na kawngah tha thawh hlawk ber zinga mi a ni. Thangpuia hian kum 2014 khan Mizoram aiawhin Santosh Trophy a chawi tawh a, kuminah Services kawr hain a chawi leh bawk.
Hei bakah hian nikum khan Thangpuia hian National Games-ah Services hi gold medal a lakpui. Services defender Thangpuia chuan, "Kan vanneih kum a ni a, hun harsa karah kan chak leh hram hram ṭhin. Mizoram nen kan inkhelh ṭumin red card ka hmu a, ka tihsual liau liau a ni. Sawmfela leh Mizo mipui chungah ngaihdam ka dil e," tiin Vanglaini a hrilh.
Services hian kumin inelnaah Goa chiah an hneh lo a, final round group stage-a an hneh loh Goa hi final-ah an hneh leh ta tho. Tihian, Services hian nomawi pasarih an chawi ta chiah a, Kerala nen an champion zat inangin Punjab (vawi riat) leh West Bengal (32) te chiah an tluk tawh lo.
Santosh Trophy final-ah Mizo
Golden Jubilee Stadium, Yupia-a final khelh zawh takah Mizoram tel pha lo mah se Mizo tlangval Zothanpuia telna Services an champion. AIFF Annual General Boby Meeting nei tura Itanagar pantu MFA leh AIFF hruaitu LV Lalthantluanga (AIFF Finance Committee) leh Lalrengpuia (AIFF Futsal Committee) ten final hi an chhim. Nimin khan AIFF AGM hi neih niin thutlukna siam pawimawh zingah India ram league sang ber Indian Super League-a VAR hman pawh a tel.