A lungthu kim nana Ramhlun N hnehtu Sialhawk

Mahindra XUV3OO LPS Cup quarterfinal lut a hriat kim ta. Zirtawpni zan inkhel hmuhnawmah Sialhawkin 2-1 in Ramhlun North an hneh a, 2022 Inter Village Football leh nikum YMA Football-a an lo hneh tawh hi a lungthu kim nan an hneh nawn.

RG Stadium, Mualpuiah team pahnih ṭawiawmtu fans an tam a, au ring hmasa zawk erawh Sialhawk an ni - minute 34-naah F. Lallawmkima chuan goal kilah mawi zetin hmahruaina goal a khung.

Ramhlun N-in si phurh sut ngei tumin theihtawp an chhuah zui a, chawlhlawk hmaa K. Zothanmawia chance neih duhawm chu Sialhawk goalkeeper TC Ramnundanga'n ṭha zetin a nam chhuak.

Second half-a ni a, Ramhlun N-in goal an khung hmasa ve ta thung. Sialhawk defender Vanlalduata'n minute 51-naah penalty a chawi - V. Lalchhuanawma chuan goal-ah a chantir a, winger Vanlalhruaia hmangin hmahruaina chance nei zui mah se, uiawm takin post a pet per hlauh.

Hun tawp nan minute kua chiah a awm tawh tihah Ramhlun N an chesual zui. Sialhawk forward tlan chak Rotluangliana chance neih chu Ramhlun N keeper Vanlalhriata'n tlan chhuakin, penalty box pawnah a kutin a dan persak - Hriata hnawhchhuah a ni.

A tam zawk Sialhawk an hriam sawt a, Moses Lalrinzuala'n freekick hmanga bar a pet perte chu uiawm tak a ni. Mahse, vanneihnain Ramhlun N lam a ṭang reng bik lo. Sialhawk forward Lawma ball cross chu Ruatdika'n a kutin a lo dang a, penalty a chawi.

Moses-a'n harsatna nei loin goal-ah a chantir a, hun pek belh a nih tawh avangin Aizawl team tan thawhlehna hun a awm tawh lo - 2-1 in Sialhawk an chak a, a lungthu kim nana Ramhlun N hnehin, quarterfinal an lut.

Zirtawpni zanah round of 16 khelh zawh a ni a, Aizawl district pawn aṭanga sawm bik pali aṭangin pathum Sialhawk, Thenzawl Jt. leh Kawnpui Jt. ten quarterfinal an lut a, champion lai Armed Veng, vawi thum champion tawh Ramhlun South, 2016 champion Bethlehem Vengthlang, Sihphir Venghlun leh Vaivakawn te chu a thiam pariat zingah an tel bawk.

Inrinni zan khan quarterfinal-a inhmachhawn tur pawh nghal a ni a, naktuk aṭangin quarterfinal hi khelh ṭan a ni ang.