Aizawl FC an che fuh thei lo

I League-ah Aizawl FC-in B. Malsawmtluanga hoin kum 2023 ṭha takin khar mah se kum 2024-ah an che fuh thei tawh lo. Mizo club hian March 9, Inrinni zan khan Shillong Lajong 2-1 in an hneh lo a, kumina match nga an khelh tawhah chak hmel an hmu lo.

RG Stadium-a inkhelah Lajong tan Phrangki Buam-a'n goal hmahruai a khung a, Aizawl FC-in Lalrinzuala penalty hmangin sut mah se injury time-ah Damaitphang Lyngdoh-a'n mawi zetin Lajong chakna goal a khung.

Mizo club-in Shillong-ah Lajong hi 3-0 in an hneh a, RG Stadium-ah erawh an ngam lo zawk. Inkhelh ṭan aṭanga rei loteah Buam-a'n cross bar a pet per a, AFC defender Ivan Maric tihsual vangin Hardy Cliff-a'n keeper chauh hmachhawn mah se a ti goal thei lo.

Lajong inkhel thunun rah an seng a, minute 27-naah box chhunga vengtu nei lo Buam-a'n ṭha zetin a tauh lut. AFC-in chance an nei meuh lo a, Lajong erawhin second half ṭantirh aṭangin an nawr nghal a, Hardy bakah Buam ten hun ṭha an hloh.

Mizo club-in Lalbiakdika hmangin penalty an beisei a, pek an ni lo. Mahse, BD-a hian referee duhsakna a dawng ta tho a; Serchhip tlangval Rinzuala'n minute 81-naah si phurh sutna goal khugin tun season-a a goal 10-na a ni bawk.

Aizawl FC-in goal an khung hmain keeper Nora Fernandes a langsar a, mah se Mizo club hi Fernandes pawhin a chhan thei ta lo. Damaitphang-a'n box pawn aṭangin goal kilah a hlai lut a, 2-1 in Lajong an chak.

Mizo club hian nikum December 10 khan Lajong 3-0 in an hneh a, hemi hnu hian match riat khel leh tawhin chak an la nei lo a, vawi li ngawt an chak lo. Aizawl FC hian March 14, Ningani hian an muala an hneh loh Gokulam Kerala chu khualmualah an hmachhawn dawn a, hmabak a harsa dawn hle.

Inkhel dangah Mohammedan chuan 3-1 in Namdhari an hneh a, Kolkata club tana goal hmahruai khungtu hi Mizo tlangval Zodingliana Ralte a ni. Mohammedan hian match 18-ah point 41 an hmu tawh a, champion turin an dinhmun a ṭha.