Gold medal pahnih la

Khelo India REC Eastern Open Talent hunt - Sub Junior & Junior neih zawh takah Mizo boxer pahnihten gold medal an la.

Guwahati-a inelna neih zawh takah hian North Vanlaiphai boxer TC Malsawmkimi chuan 48kg Junior Girl huangah gold medal a la. Siaha boxer L. Joseph Buihringpachha pawhin 57kg Junior Boys huangah pakhatna dinhmun a luah bawk.

Mizo boxer pahnih hi Khelo India REC National Championship khel turin thlan nghal an ni. Heta tiṭhate hian scholarship an dawng ang a. National Coaching camp neih pui an ni ang a, international thleng a an inlan theihna kawng a awm dawn a ni.