Kane awmna Bayern chak chiang

Harry Kane chuan Bundesliga mellung hlu tak a phun - England captain hi German football inelna sang bera inlan tirh season khatnaa hattrick vawi li siam thei hmasa ber a ni.

Bayern Munich striker hian Inrinni zan khan Mainz lakah goal thum a khung - Kane bakah hian Leon Goretzka chuan goal hnih khungin, Thomas Muller, Jamal Musiala leh Serge Gnabry ten goal khat ṭheuh an khung bawk.

Thomas Tuchel enkawl Bavarians hian kum dang angin season an hmang ṭha tawk lo a, sawiselna pawh an tawng nasa. Mainz lakah erawh kawng tinrengin inkhel an thunun a ni satliah lo, a khat mawi tawkin goal an khung char char.

Kum 30 mi Kane hian tun season league match 25 a khelh aṭangin goal 30 a khung tawh a, match khelh hmabak an la ngah avangin sulhnu ropui tak a hnutchhiah ngei dawn tih a lang tawh.

Bayern Munich hian hmahruaitu Bayer Leverkusen nena an inkar chu point sarihah an tihniam leh rih. Xabi Alonso naute hi nizan khan inlanin an chak a nih chuan an inkar a zau leh rih thei dawn a ni.

Tottenham aṭanga nomawi chawi duh avanga Bayern zawmtu Kane chuan, "A nihna tak sawi chuan Leverkusen hi champion tura rinkai zawk an ni a, an dinhmun pawh a ṭha zawk. Chutihrualin kan la beidawng bik lo.

"League match khelh hmabak 10 a la awm, hengah te hian hnehna chan kan tum vek tur a ni ang. Leverkusen hian season duhawm tak an hmang a, chuvangin an thlen chinah hian kan lawmpui tur a ni bawk," tiin a sawi.

Kane tan hian mimal ang chuan kum ṭha tak a ni mek, ram leh club tan inelna hrang hrangah goal 40 a khung der tawh - a pawimawh ber erawh season tawpah nomawi engzat nge a chawi tih a ni ang.

Inrinni zan Bundesliga inkhel dangah Borussia Dortmund chuan Werder Bremen lakah 2-1 in hnehna an chang. Dortmund tan hian Manchester United aṭanga loan hmanga an hawh Jadon Sancho chuan chakna goal a khung a ni.