Joshua hmaah Ngannou a tlu

Anthony Joshua chuan world heavyweight champion ni leh turin theihna sang tak a la nei reng tih a pholang - Inrinni zing khan Joshua hian UFC champion hlui Francis Ngannou chu a hneh a, round hnihna lekah a knockout!

Kum 34 mi Joshua hian round khatnaah Ngannou hi chhuat laiah a zalh nghal a, mahse, Cameroonian fighter hi a tho leh vat - second round-ah Joshua hian na takin Ngannou a deng nawn a, "Muttui" tiin a thlah fel der.

Kingdom Arena, Riyadh, Saudi Arabia-ah chiang takin Joshua a chak a, a hmuna entu Tyson Fury-a'n hmuhnawm a ti lo mai thei - WBC heavyweight champion Fury hian October khan Ngannou hi a hmachhawn a, a vawi khat nana boxing ring chhung raptu hi awlsam takin a hneh mai ringtu an tam hle.

Mahse, Fury hi vannei takin, split decision hmangin a chak hram a, tam tak chuan Ngannou hi a chak zawkah an ngai hial. Hei vang hian Fury aia mi tam takin an dahsan loh zawk, tharum ngah mah se skills-a sang lo tia an sawi ṭhin Joshua hian ringtu a nei tam lo. Mahse, a hunah tak Joshua hian a theihna a pholang.

British boxer chuan, "Chak ngei duhna thinlung ka nei a, chu chu a pawimawh ber chu a ni. Hetihlaia a zahve deuhthaw hian Ngannou hi chak turah indah a, mahse, kei chuan ka hna ka lo thawk mai a ni," a ti.

May thla hian Fury leh Oleksandr Usyk te chu undisputed heavyweight champion nih tumin an inhnek zui ve dawn - Fury hian WBC kawnghren kawl mekin, Usyk hian WBA, WBO leh IBF champion kawnghren a kawl thung a, Joshua promoter Eddie Hearn chuan he inhneka chak zawk hi hmachhawn an duh thu a lo sawi tawh.

Mahse, Joshua erawhin he lam hawi sawi duh loin, a chak chhan chu a trainer thar Ben Davison vang a nih thu a sawi. Fury nen pawha thawk dun tawh Davison hian nikum kum tawp lam aṭang khan Joshua hi a train ṭan a, vawi hnih fight hmachhawnpuiin, chiang takin a chak ve ve.

Kum 37 mi Ngannou tlawm mah se, tawp a tum lo. Ngannou chuan, "Hei hi ka tawpna tur a ni lo tih ka sawi duh. Ka vanneih ni a ni lo a, vawiin chu kei aiin a ṭha fe a ni. A hrehawm ka ti a, mahse, hei hi infiamnain a ken tel chu a ni," a ti.

Ngannou hian UFC-a a fight hnuhnung berah khan Ciryl Gane hnehin a heavyweight title a humhim a, a sum hlawh zat erawh $6,00,000 bak a ni lo a, Joshua a hmachhawn hian dollar maktaduai 20 vel a hlawh niin an sawi - Joshua hi dollar maktaduai 50 velin a hausak belh thung.