Barcelona chhantu kum 16 mi Yamal!

Spanish champion Barcelona chuan Zirtawpni zan khan 1-0 in Real Mallorca an hneh a, inkhela goal awmchhun hi Lamine Yamal khung a ni - kum 16 mi rawlthar hian tun season inelna hrang hrangah match 37 khelin goal ruk a khung ta a, assist vawi sarih a nei bawk.

Barca hi hrem vangin coach Xavi chuan khelmual sirah a ho thei lo a, heti chung hian inkhel bul an ṭan ṭha hle. Minute 24-naah penalty an hlawh chhuak zui a, winger Raphinha chu defender Jose Manuel Copete chuan penalty box-ah a titlu.

Mahse, penalty pettu Ilkay Gundogan chuan an chance duhawm hi goal-ah a chantir thei lo a, Mallorca goalkeeper Predrag Rajkovic chuan a dansak. Yamal-a'n woodwork a tihper zui a, Marc Guiu chance neih chu Serbian keeper Rajkovic chuan a dansak bawk.

Barca-in goal khung ngei tumin Vitor Roque leh Robert Lewandowski an luhtir a, mahse, Roque hian uiawm takin a tauh over zui. A tawpah erawh Barca an vannei ta nge nge a, Lewy siamsak chu Yamal-a'n ṭha zeta a lakluh hnuah goal-ah a chantir - goal mawi bik a ni.

Catalan club-in 1-0 in hnehna an chang zui a, champion an beiseina a la thi lo. Hetihlai hian Atletico Madrid erawh Cadiz khelmualah 2-0 in an tlawm a, Juanmi chuan mualneitu team tan goal hnih a khung.

Atletico hi table-ah palina nih chhunzawm mah se, an hnuai chiaha awm Athletic Bilbao-in nizanah Las Palmas an hneh chuan Diego Simeone-a naute nen hian point hnih chauhin an inthlau dawn - an result kan hre hman lo.

Girona-in Portu leh Savio goal hmangin Osasuna chu 2-0 in an hneh a, table-ah pahnihna an nih chhunzawm. Pathumna Barca nen point khat chiahin an inthlau a, Real Madrid chuan table chung berah point liin hma an la hruai fal mek.

Carlo Ancelotti naute hian nizanah Celta Vigo an mikhual a, he thu buatsaih a nih lai hian result kan hre hman lo. An chak chuan point sarihin hma an hruai fal leh ang.