Inter Milan an chak hram

Serie A champion turin an dinhmun a ṭha tawh bawk a, tunah chuan Inter Milan hian Champions League an ngaipawimawh zual thei tawh, player ṭhenkhat dahṭha chungin Bologna chu 1-0 in an hneh.

Simone Inzaghi-a'n tun kara Atletico Madrid nen UCL last 16 an khelh tur a ngaihtuah a, striker ṭha Lautaro Martinez, defender Denzel Dumfries leh Benjamin Pavard te chu bench lamah a dah.

Bologna hi season thara Champions League khelh tum ngam an ni a, chetsual theihna tur tak an ni. Mahse, Inter hian minute 37-naa German defender Yann Bisseck-a goal hmangin hnehna an chang ta tho.

Serie A bikah Inter Milan hi a zawnin vawi 10 an chak ta chiah, tun season league match 28 aṭanga point 75 hmuin hma an hruai fal tawh hle a, anmahni hnaih bertu Juventus aiin point 18 ngawtin an sang - Juve hian match khatin an khel tlem thung.

Inter Milan coach Simone Inzaghi chuan, "Kan hnunga awmte nena kan inkar kan tizau thei ṭhin hi a lawmawm, chawlhlawk hma khan a phu zawk kan nih ang ngeiin goal kan khung.

"Bologna khan palina luahtu an nihna kha khelmual chhungah a takin an lantir thei a, keini tan pawh hmachhawn an harsa hle. Tun aia an dinhmun hi a sang chho a nih pawhin a mak lo ang," tiin an khingpui team a dahsang hle.

Season hmasa nena khaikhin chuan Inter Milan hian season tluana an point hmuh zat aiin tun season kal laiah point thumin an hmu tam tawh zawk, match khelh hmabak 10 ngawt an la nei zui.

Italian manager Inzaghi chuan, "Tunah hian season kan la zo lo a, a hmawr kan la bawk lo. Ka naute hian tun hun thleng tur hian hun rei tak chhung an bei tawh, a tawp thlenga kan beih chhunzawn ngei ka ring," a ti.

Kartawp Serie A inkhel dangah Napoli chu Torino nen 1-1 in an inhnehtawk. Champion lai Naples club hian point 44 chauh an la hmu a, league nomawi an hloh dawn tih a chiang thawkhat tawh - a sang zual pali zinga tel phak hram an tum ang.