Swiatek leh Kerber an tlang

Hmeichhe tennis world number 1 Iga Swiatek chuan Indian Wells khelh laiah third round a inhlangkai a, tun hnaia rawn khel ṭha chho leh mek Angelique Kerber pawh a la chak tluang zel.

Inrinni zan second round inkhelah Swiatek hian Danielle Collins chu 6-3, 6-0 in a hneh a, set hnihna bikah phei chuan Polish nula hian American player lakah game a hloh miah lo.

Kum 36 mi Kerber pawhin seeded 10-na ni phak Jelena Ostapenko chu 5-7, 6-3, 6-3 a hnehin third round a lut ve bawk. Fa a neih hnuah German player Kerber hian match vawi thumah chauh hnehna a la chang a ni.

Swiatek leh Kerber an chak lai hian champion lai Elena Rybakina erawh a inhnukdawk. Rybakina hi Argentine nula Nadia Podoroska nen inkhel tur ni mah se damlohna vangin a inkhel thei ta lo.

Emma Raducanu pawh hmalam panin a la kal zel. Britain nula hi Dayana Yastremska nen an inhmachhawn a, set khatna bik hi minute 18 chauh khel hmanin 4-0 in hma a hruai a, a khingpui hi damlohna vangin a inhnukdawk.

Kum 21 mi Raducanu chuan, "A bul ka ṭan ṭhain game hmasa pali ka khel ṭha takzet. Mahse, Dayana chunga thil thleng kha ka tawrhpui, damlohna vanga inkhelh theih loh a hrehawmzia chu kei pawh hian ka hria," a ti.

Tleirawl chhuak thar hmuhnawm zinga mi Coco Gauff pawhin Clara Burel chu 2-6, 6-3, 7-6 (7-4) in a hneh a, inkhel dangah Caroline Wozniacki, Wimbledon champion Marketa Vondrousova leh Jasmine Paolini te an chak bawk.