Andy Murray a chak lo

Tennis chawlhsan la hreh viau mah se Andy Murray tan thil hi a awlsam tawh bik lo a ni. Britain tlangval hian Andrey Rublev chu straight set hmangin a hneh lo - Indian Wells khelh laiah second round a paltlang zo lo a ni.

Inrinnia inkhelah kum 36 mi Murray hi Russian tlangval lakah 7-6 (7-3), 6-1 in a chak lo a, inelna tir lamah khel ṭha ve pangngai viau mah se California a chhuahsan a ngai leh rih ta phawt.

Grand Slam vaw thum champion tawh Murray chuan, "Ka tan chuan California hi hmun nuam tak a ni, a mi chengte hian tennis an ngaina a, mimal taka ṭantu pawh ka nei ṭha ṭhin, mahse an beisei ang result ka nei lo erawh a pawi," a ti.

Inkhel dangah Australian Open champion Jannik Sinner a chak. Italian tlangval hian Australian mi Thanasi Kokkinakis chu 6-3, 6-0 in a hneh, chak turin darkar khat leh minute 21 chauh hun a mamawh.

Champion lai Carlos Alcaraz tan pawh hna a la harsa lo. Spanish star hian Matteo Arnaldi chu 6-7 (7-5), 6-0, 6-1 in a hneh. Seeded parukna Alexander Zverev pawhin 6-4, 6-4 in Christopher O'Connell a hneh a, seeded 11-na Stefanos Tsitsipas pawhin Lucas Pouille 6-3, 6-2 in a hneh ve bawk.