Arsenal lawm nan Liverpool leh City an inhnehtawk

Pathianni zan khan ennawm ropui chhawpsak kan ni a, football chu a ropui leh mawi thei ang berin a inchhawp chhuak a ni ber! Premier League inkhel hmuhnawm bikah Liverpool leh Manchester City an inkhel a, 1-1 in an inhnehtawk.

City tan John Stones chuan minute 23-naah goal hmahruai a khung a, Liverpool-in Alexis Mac Allister-a goal hmangin an chhanglet - hun tawp thlengin goal dang a lut lo a, Anfield-ah chak zawk an awm lo.

Team pahnihin an chak chuan champion an hnaih sawt dawn tih an hria a, mahse, Arsenal fans lawm nan an inhnehtawk ta zawk. Gunners hian point 64 hmuin Premier League table chung ber an luah chhunzawm a, Liverpool (64) leh City (63) ten an dawt.

Premier League match 10 khelh tur a la awm a, club pathum point neih zat thlirin a la ngaihnawm dawn chauh tih a chiang. Club pathum hian Manchester United, Tottenham Hotspur leh Aston Villa an la tum vek dawn a, Arsenal leh City an la intawng dawn bawk!

Anfield a reh

Club tam takin Anfield-a lenluh an hreh ṭhin a, Liverpool hmachhawn piah lamah an fans thawm bengchheng tak chu player tuaitir tan phei chuan zamna tham a ni ṭhin - Pathianni zanah pawh Liverpool fan-te thawm a ring lehpek hle.

Pep-a'n 4-1-4-1 formation hmangin, fimkhur takin team a rem a, player langsar chhawr theih loh a nei lo. Liverpool erawhin hliam vangin Ibrahim Konate an chhawr thei lo a, hliam damkawr Mohamed Salah chu Andy Robertson nen bench-ah an awm a, Alisson-a'n si ban a la nghak thei lo tluang zel bawk.

Liverpool chu chance hlauhawm tia sawi tur nei hmasa zawk an ni a, rawlthar duhawm Conor Bradley chuan ṭha taka ball a lakluh hnuah uiawm takin a pet out - Darwin Nunez-a'n tlawh hman ngat se a goal ang.

Mahse, minute 23-naah City an inlar. Kevin De Bruyne-a corner aṭanga ball kal chu Stones-a'n goal-ah a chantir a, Anfield thawm ring tak chu a reh duk - City goal hi training-naa duan sa ang mai a ni.

Hei le Liverpool

City-in goal an khung hnuah Erling Haaland kan hmu a, Virgil van Dijk ven karah 'shot' mah se, Norwegian striker ball pet hi Caoimhín Kelleher tan man nuam tawk a ni - hei bak hi chu Haaland kan hmu zui meuh lo!

Liverpool-in chawlhlawk hmain si phurh sutna remchang an nei a, mahse, Luis Diaz chuan uiawm zetin goal sirah a pet. Minute 50-naah erawh Reds an vannei ve ta nge nge - Nathan Ake back pass chu Nunez-a'n a nangching a, Ederson chuan Uruguayan forward hi a lo titlu.

Referee-in penalty spot a kawk a, Mac Allister chuan goal-ah a chantir. Hliam vangin Ederson thlak a ngai zui a, Reds an hmuhnawm tawlh tawlh - Salah siamsak ṭha lutuk Diaz-a'n goal-a a chantir lo chu uiawm a tling a, City keeper Stefan Ortega-a'n Nunez-a chance hnai set sawt aṭanga a dan pawh pui tak a ni.

City-in chance nei lo an ni bik lo. Klopp-a'n, "English player ṭha ber," tih hiala a sawi Phil Foden-a hun neih chu Kelleher-a'n a dansak a, Reds keeper hian Ake-a cross chu Foden-a awmah tak hnek perin, a per lehlam hian crossbar a per bawk - Jeremy Doku chuan post a pet per bawk a, a tawpa an ṭinna erawh 1-1 a ni.

Lawm lohna

Diaz-a'n vawi tam ṭha takin ball la lut ṭhin mah se a hmawr a bawk ṭha tawk ṭhin lo a, Colombian forward hian finishing zir ṭhat a mamawh - Cody Gakpo nen an chance neih ṭhatah thutlukna siam tura hun an mamawh rei lutuk pawh chu uiawm a tling.

Hetihrual hian Liverpool-in lawm lohna pakhat an nei a, chu chu hun pek belha penalty ni ngei tura lang pek an ni lo chu a ni - Doku chuan Mac Allister-a awmah a tlawh a, Reds-in penalty an beisei.

Mahse, referee Michael Oliver-a'n penalty turah a ngai lo a, video assistant referee hmanga en a nih hnuah pawh a ngaihdan a sawhsawn lo. Jurgen Klopp chuan, "Chhun chawlh lai khan engemaw a ei le?" tiin referee thutlukna chu mak a tih thu a sawi.

He thil a thlen hian hun pek belh minute riatna a ni tawh a, referee-in penalty pe se, hun tawp zui tur a ni. Mahse, a pe lo miau a, Liverpool-in a tawpa an zirchhuah chu goal khung zir ṭhat an mamawh tih chu a ni!