FIFA Santosh Trophy vawi 77-na a ṭiak ta

77th National Football Championship for Santosh Trophy chu March 11, Inrinni zan khan a ṭiak ta a, inelna thlengtu Arunachal Pradesh-in an thleng ṭha. Mizoramin kum nga hnua a vawi khat nan final round khelin semifinal an lut a, champion zui ta Services hneh lo mah se kumin kum tawpa neih tur Natonal Games khel turin an inpettling.

Inbuatsaihna ṭha

Arunachal Pradesh Football Association-in Santosh Trophy thlen an dil khan, final round pawh la khel lo Arunachal Pradesh tan a hautak hret tura ngaih a ni. Mahse, APFA president Pema Khandu hi Arunachal Pradesh Chief Minister a ni a, APFA honorary secretary Kipa Ajay hi AIFF-ah Treasurer a ni bawk.

Arunachal Pradesh hian Santosh Trophy final round khelh tawha chhinchhiahtlak ber thlen tumin an inbuatsaih a, an thlen dan leh state hrang hranga kal khawmte ngaihdan aṭangin an thleng ṭha tih a lang.

Delhi manager Nagendra Singh chuan, "Kum 1992 aṭang khan National Senior Championship-ah team ka kaihruai ṭan tawh a, hetiang reng renga thleng ṭha hi ka la hre ngai lo," tiin state hrang hrang manager-te inhmuhkhawmnaah a sawi.

Stadium ṭha

Arunachal Pradesh-in inelna lian thleng turin stadium an nei ṭha. Final round khelhna Golden Jubilee Stadium hi India ram pum huap ang pawhin a zahpuiawm loh hle. Stadium hi a nihna tur ang takin zawh la ni lo mah se football khelhna tur chuan zawh a ni tawh.

Dressing room pawh pali ṭha a awm a, ni khatah inkhel pathum a awmin buaina an nei lo. Chawhma dar 10:00 inkhela dressing room kha zan dar 7:00-ah hman a ni leh chauh a, a tifaitu lamin duh thalin an tifai hman. Stadium chhungah conference room ṭha tak a awm a; match commissioner, referee leh medical lamin room ṭha tak an nei vek.

Entu mipui lam tan pawh inthiarna hmun a ṭha a, parking ṭha tak a awm. Stadium sak nana project man hi nuai 5948.80 a ni a, ennawn hnuah nuai 7078.90-ah a kai chho. Arunachal Pradesh-in stadium rotling an nei a, a hlawkpuitu chu Arunachal Pradesh Football Association an ni.

Stadium-ah hian entu 15,000 an leng a; Arunachal Pradesh inkhelh zan bakah semifinal leh final zanah te an khat a, inkhel dangah pawh entu an ṭhahnem. Mi pakhat tan inkhel en man hi Rs. 100 a ni a, APFA hian inkhel en man aṭangin sum ṭhahnem tak an an la lut. Stadium an neih ṭhat zarah sum a lut tam tiin a sawi theih.

Mikhual thlen dan

APFA hian team zawng zawng hnenah Liaison officer (LO) an pe vek a, an thlen chhunga an duh anga an hman theih turin Force Traveller an chhawpsak bawk. LO leh driver-te hi hotel thlennaah an riak a, biangbiak an nuam em em bawk.

Kumin final round-ah hian inelna thlengtu Arunachal Pradesh bakah Services, Goa, Mizoram, Manipur, Kerala, Assam, Meghalaya, Dehli, Railways, Maharashtra leh Karnataka te an tel a; team aiawhte an lungawi tlang hle.

Kerala team manager Dr Sudhir Kumar chuan, "National Games ang maia ṭhain an thleng," tiin Vanglaini a hrilh a, state dang hruaitute pawh an thlen danah an lungawi tlang hle.

Ṭha tur a ni!

Arunachal Pradesh hian Santosh Trophy hi thleng ṭha tur ve reng pawh an ni. A chhan chu, sum hman tur an ngah tlat. Final round ṭha taka an thlen theih nan hian 'event management' an ruai tawp. TV production atan ringawt hian nuai 78 an seng hem mai.

Inkhel zawng zawng hi APFA YouTube Channel-ah an pe chhuak vek a, FIFA+ bakah an mahni tualchhung channel-ah te an pe chhuak. Sum an sen tam avangin inkhel en pawh a nuam. Inkhel live nan hian Camera 12 an dah a, Production team hian Broadcast Director nei thlapin, inbuatsaihna pawh an nei ṭha hle.

Mizoram manager K. Lalenghluna (Maenga) chuan, "Inkhel en a nuam si a, heti tak maia an tih ṭhat avang hian kan zawt chiang a. An budget pawh nuai 78 daih a ni. Tam ka tih deuh avangin an outsource-na Pabitra Benerjee te kan zawt leh a, a lo dik thlap. Pabitra hian sports minister Pu Tetea leh Zonet lam pawh a hre ṭha hle," tiin Vanglaini a hrilh.

AGM pawh an thleng

APFA hian March 10, Pathianni khan All India Football Federation (AIFF) Annual General Body Meeting pawh an thleng nghal a; AGM hi Hotel Obsidian Blue Conference Hall, Itanagar-ah neih a ni. AIFF hnuaia committee peng hrang hrang pawhin meeting an nei nghal a, Mizoram aṭangin LV Lalthantluanga (AIFF Finance Committee) leh Lalrengpuia (AIFF Futsal Committee) te AGM-ah hian an tel bawk.

APFA hian football atana sum an sen ngam avangin anmahni chhungah hmasawnna pawh a awm tih a chiang. Final zanah mi pathum an chawimawi. SAFF U-19 Football Championship 2023, Nepal-a India champion puitute zinga mi Yash Chikro; AFC Asian U23, Thailand-a neiha India team-a tel Omang Dodum leh Asian Futsal Championship 2024 Qualifiers, Tajikistan-a India assistant manager Koncho Tas te an ni.

Arunachal Pradesh-in football-ah hma an sawn a, final round an thlen theih avangin an football team-in a vawi khat nan final round an khelh theih phah. Arunachal Pradesh bakah India ram state dangte pawhin hma an sawn a, state league neih ṭhat kawngah hma an la nasa hle. Mizoram tan India ram awp a la har a, state dang ruala kal tur pawhin Mizoram Football Association tan ṭan nasat a ṭul khawp ang.