Goal khung ngei ngei mamawh Arsenal

Arsenal chuan zanin dar 1:30 hian Porto an lo mikhual dawn. Mikel Areta naute hian Champions League quarterfinal lut tur chuan goal an khung ngei ngei a ngai dawn a ni.

Portuguese club an tlawh ṭumin Gunners hi 1-0 in an chak lo. Last 16 second leg hi Emirates Stadium-ah an khel thung dawn - North London club hi an boruak ṭhat lai a nih avangin goal phur zawk ni mah se an buk a la rit zawk ang.

Premier League hmahruaitu Arsenal hian kartawp inkhelah Brentford chu 2-1 in an hneh, hun tawp dawnah Kai Havertz chuan chakna goal a khung hram, zaninah an ṭhat dan bera inrem chungin an inlan dawn.

Arsenal manager Arteta chuan, "Champions League quarterfinal kan khelh lohna a rei tawh, kum 14 chhung ngawt a ni tawh. Chuvangin tun ṭumah hian coach leh player chauh kan ṭan a tawk dawn lo, stadium chhunga inkhel entute puihna kan mamawh.

"Emirates Stadium hi thawm ring leh mikhual tana hmun hrehawm tak ni turin ka duh," tiin player chauh ni loin fans lam chu theihtawp chhuah leh zual turin a ngen, a player hliamte an dam tawh hlawm avangin beisei an la nei sang.

Spanish manager hian tun hnaiah Havertz chu tlarhma laiah a chhawr nasa. European football-ah erawh striker pangngai Gabriel Jesus a chhawr a rinawm, Brazil international hi Bees an hmachawn ṭum pawhin bench aṭangin a lut a ni.

UCL last 16 second leg inkhel dangah Barcelona chuan Napoli chu Nou Camp-ah an lo mikhual dawn. Team pahnihte Diego Maradona Stadium-a an inkhelh ṭumin 1-1 in an inhnehtawk, tun ṭumah chuan inhnehtawk a awm thei tawh dawn lo.

Xavi Hernandez enkawl Barca hian La Liga nomawi an kawl lai chu Real Madrid lakah an hloh ngei dawn niin a lang tawh a, league lamah beisei phak lo mah se Champions League an la beisei thei, an champion hlauh a nih chuan an tan season ṭha tak a ni daih thei.