Fourth round-ah Alcaraz a lut

Indian Wells mipa champion lai Carlos Alcaraz chuan nimin zing khan Felix Auger-Aliassime chu 6-2, 6-3 in a hneh a, harsa lutuk loin last 16 a inhlangkai - Fabian Marozsan nen an intawng leh ang.

World number 2 Alcaraz hian season hmasa khan set hloh miah loin Indian Wells nomawi hi a chawi, kuminah chuan a match hmasa berah set a hloh tawh, a hnu lamah insiamṭha tawhin a nghet leh tawh hle.

Spanish tlangval Alcaraz chuan, "Inrintawkna ka neih belh zel a, tunah chuan ka inkhel hi duhthusam a ni leh teuh tawh hle. A nihna tak sawi chuan training neih laiin harsatna ka nei ṭhin, inelna taka ka khel ṭha hi a lawmawm," a ti.

Inkhel dangah seeded pathumna Jannik Sinner pawhin German tlangval Jan-Lennard Struff chu 6-3, 6-4 in a hneh a, seeded 11-na Stefanos Tsitsipas pawhin American player Frances Tiafoe chu 6-3, 6-3 in a hneh.

Hmeichhe inelna lamah world number 1 Iga Swiatek chuan Australian Open 2024-a a ngam loh Linda Noskova lakah 6-4, 6-0 in hnehna a chang a, a match lehpekah chuan Yulia Putintseva a hmachhawn dawn a ni.

Champion thei tura rinkai zinga mi Angelique Kerber leh Caroline Wozniacki te pawh an la chak zel a, anni pahnih hi last 16-ah an intawng dawn, pakhat zawk zinkawng chu a tawp ngei a ngai dawn.