Intlansiak hmasa berah Bagnaia a chak

MotoGP season thar chu Pathianni zan khan tlan ṭan a ni a, inelna neih hmasak berah hian Francesco Bagnaia chuan hnehna changin bul a ṭan fuh hle.

Qatar Grand Prix-ah hian kum 27 mi Bagnaia hian pangana aṭangin bul ṭan mah se lap hmasa berah hma a hruai nghal thei, a hnungah hian KTM bike khalhtu South African tlangval Brad Binder chu a thleng.

Italian tlangval Bagnaia chuan, "Sprint race-ah palina kan ni a, nasa taka hmasawn a ngai tih kan inhria. Kan team hian theihna sang tak kan nei, chumi kan hmang chhuak thei chu a lawmawm hle," tiin a sawi.

Inrinni lama tlan zawh tak 'Sprint Race' bika hnehna changtu Jorge Martin chu dawhsan (podium) lawn chin a ni bawk a, bike intlansiakna sang bera vawi ruk champion tawh Marc Marquez-a'n Gresini Racing tana a bul ṭannaah palina dinhmun a luah.

Tun season intlansiak pahnihna atan tun thla tawp lam hian Portuguese Grand Prix an tlan leh dawn a ni.