Saudi Arabia-ah pawh Verstappen

Vanglai hmang mektu Max Verstappen chu dan theih loh ang maiin a tlan leh ta cher cher mai - Pathianni zana tlan zawh tak Saudi Arabian Grand Prix-ah Red Bull driver hi a chak ber, tun season intlansiak pahnih an neih tawhah a chak ve ve a ni.

Car intlansiakna sang berah hian nikum September thla aṭang khan a la chak ngar ngar, season hmasa nena chhiar zawm chuan Verstappen hi a zawnin vawi kua a chak tling leh ta, nomawi a kawl lai chhuhsak a harsa khawp ang.

Dutch tlangval Max-a hnungah hian amah ang bawka Red Bull car khalhtu Sergio Perez a thleng a, pathumna chu Ferrari driver Charles Leclerc a ni a, ani hi Red Bull driver pahnih chhaih buai phak deuh ber tura ngaih a ni.

Tun hnaiah Verstappen leh a team Red Bull inkarah sawi neuh neuh a awm, khawthlang chanchinbu mite chuan an sawi tui hle. Mercedes ngei pawh inrawlhin an hnenah Max-a tan hmun a awm thu thlengin an sawi, intlansiak chhungah erawh buaina nei lo ang hmakin an che thei thung.