La Liga hmahruaitu Real Madrid

Real Madrid-in league nomawi chawi ngei an tum tih an pholang leh ta a, Pathianni zan khan an mikhual Celta Vigo chu 4-0 ngawtin an sawp - point sarihin La Liga-ah hma an hruai fal leh ta a, point 69 nei mekin, Girona (62) leh Barcelona (61) ten an dawt.

Madrid khaw club hian Valencia laka a chet dan avanga match hnih inkhel thei lo tura hrem Jude Bellingham tel loin Celta Vigo an mikhual a, an thiampuipa tel lo pawhin harsatna an tawk lo - minute 21-naah Vinícius Júnior chuan goal hmahruai a khung.

Real hian goal dang khung tur erawhin an nghah rei a ngai hle. Minute 79-naah Real hian an goal hnihna an khung ve chauh a, Antonio Rudiger-a ball tauh chuan bar a per hnuah a per lehlam chuan Celta keeper Vicente Guaita a per a, a goal daih!

Celta Vigo an talbuai zui. Minute 88-naah an lamah an tilut leh a, Vinicius-a cross aṭanga ball kalah Guaita leh Carlos Dominguez an inringthul a, Celta defender Dominguez hian an lamah a tilut.

A la tawp lo - hun pek belhah Arda Guler a inlar a, bench aṭanga luhtir Turkish rawlthar kum 19 mi hian Real a pan hnua a goal hmasa ber a khung. Real-in 4-0 in hnehna an chang a, nomawi chawi ngei tumin kawng dik an zawh zel.