Pathianni zanah Hamilton a intlansiak dawn

Pathianni zan dar 6:40 hian Abu Dhabi Grand Prix tlan a ni dawn a, car intlansiakna sang ber season kal lai hmawr bawkna turah hian driver champion Lewis Hamilton a inlan thei dawn.

Mercedes driver Hamilton hian December thlatir khan Covid-19 a kai a, inelna an neih hnuhnung ber Sakhir Grand Prix-ah khan a inlan thei lo. A dinhmun a chian loh reng hnuah a team chuan an driver-in hri a kai tawh loh thu an sawi.

Britain ramah Hamilton hi ni 10 chhung khung hran niin, chumi hnuah a dinhmun endik a ni. Hri a kai tawh loh avangin Ningani khan inelna neihna tur hmun Abu Dhabi a thleng a, nimin khan inbuatsaihna an nei chhunzawm nghal.

Kum 35 mi Hamilton hian natna em em nei si loa khunghran nih chu hrehawm a tih thu a lo sawi tawh a, intlansiak thei loa awm chu a hun tawn tawh hrehawm berte zinga mi ni hiala a hriat thu a lo sawi tawh bawk.

F1 huangah Hamilton-a'n nomawi vawi sarih a chawi tawh a, record nei ṭha ber Michael Schumacher a nihrual tawh. Season tharah pawh champion tura rinkai a la ni ang.