Wolfsburg ngamtu RonaldOOO
Bundesliga club Wolfsburg-in Germany-ah Cristiano Ronaldo leh Real Madrid an hre lo a, Thawhlehni zanah erawh an hre ta. Santiago Bernabeu-ah Ronaldo hattrick hmangin Wolfsburg an lehthal a, Real Madrid-in a zawna a vawi ruk nan Champions League semifinal an thleng.
Kar liam taa Wolfsburg-in Ricardo Rodriguez leh Max Arnold te goal hmanga Spanish club lian an barakhaih ṭum khan Real Madrid an thawh leh a beiseiawm tawh lo. Amaherawhchu Real-in Ronaldo an nei a, Portugal captain goal hmangin coaching lama tawnhriat nei tlem Zinedane-a'n sawiseltute a chhang let.
Ronaldo leh goal
Real Madrid defender Ser-gio Ramos-a'n crossbar a tauh per a, an mualah Spanish club-in bul an ṭan ṭha. Minute 15-na lekah Wolfsburg tlarhnung fimkhur tawk loh hmang ṭang-kaiin Ronaldo-a'n Real goal hmahruai a khung a, second 86 lek hnuah Ronaldo-a'n boruak-ah a hlauhawm tih lantirin goal hnihna a khung zui bawk.
Minute 17 a ral chuan Real Madrid-in goal hnih an khung tawh a, inkhelh ṭan hmaa semi-final lut tura rinkai zawk Wolfsburg tan a sang pali zinga tel beisei ngam chi a ni tawh lo. Amaherawhchu Real-in away goal an neih loh avangin German club-in goal khat an khung a nih chuan Spanish club lamin goal hniha an chhan let a ṭul dawn a, hei vang hian Zidane-a hote tan ngaih ṭhatna chi a la ni bik lo.
Second half-ah Ramos-a ball tauh chuan goal ban per mah se Wolfsburg keeper zawn-ah a per let a, mikhual team an him hram. Minute 77-naah erawh German club an ṭang zo lo a, Ronaldo-a'n vawi tam a hming ṭhatpui tawhna freekick hmangin a hming a chher nawn. Minute 13 khelh hmabak la awmah Real Madrid chu dinhmun ṭha zawkah an awm.
Wolfsburg keeper Diego Benaglio a che ṭha zui a, Karim Benzema leh French striker thlaktu Jese te goal khung tur dan sakin goal dang a luh belh tawh lo.
Ronaldo leh record
2013/14 season khan Cris-tiano Ronaldo chuan Cham-pions League-ah goal 17 tehmeuh a khung a, season khata goal khung tam ber a ni. Portugal captain hian tun season-ah goal 16 a khung tawh a, ama record khum tur hian goal hnih chiah a mamawh tawh a, final an thleng thei a nih chuan match thum khelh tur a la awm.
Real Madrid forward hian Champions League-ah hattrick vawi nga a siamna chiah a ni a, Lionel Messi record a tluk chiah bawk.
De Felipe tan
Hattrick siamtu Cristiano Ronaldo chuan, "De Felipe hi Real Madrid player ropui a ni a, kan chakna hi a tan ka hlan a ni," tiin a sawi.
Real Madrid player hlui Pedro de Felipe chu kum 71-a upa niin April 12 khan a thi a, a hun laia central defender ṭha Felipe hian Real hi European Cup vawi khat a champion pui bakah La Liga nomawi vawi nga leh Copa de Espana vawi khat a chawi pui bawk.
Real Madrid forward Ronal-do chuan, "Ka tan chuan zan duhawm a ni a, ka khelh ṭhat ber zan erawh a ni lo. Mipuiin ka khelh dan an sawisel a, ka
ṭhat theih dan bera ka khelh loh avangin ka hrethiam. Harsatna ka nei a, inhliamin minti buai a, amaherawhchu min beisei ang tihlawhtling tur hian ka thawkrim a ni. Ngai ka awh chho thei hi ka lawm a, season tawpah tuna ka lawm dan ang hian ka awm zel theih ka beisei," tiin hlawhtling tura a thawhrim thu a sawi.
Tawrh a ṭul
Real Madrid coach Zinedine Zidane chuan, "Football-ah chuan hrehawm tawrh chang a awm a, engtik lai pawhin kan awm dan kan hloh tur a ni lo. Player angin pressure ka hmachhawn thiam a, coach ka nih hnuah buai ka tum lo. Tuna kan paltlang hi hna hautak a ni a, amaherawhchu kan hmabakah hian hei aia harsa hi a awm a ni," tiin result ṭha vanga buai a tum loh thu a sawi.
Team pawimawhna sawiin Zinedine Zidane chuan, "Ronal-do chanchin hi engtin nge ka sawifiah ang. Footballer a nihna anga a theihna a pholang a, khawvela player ṭha ber a ni. Chutihrualin Ronaldo hi pla-yer danglam bik ni mah se a ṭhiante puihna a mamawh a, amah pawhin a pawm ang," tiin Ronaldo vang chauha chak an nih loh thu a sawi lang.
Season khat chhunga goal khung tamte
Season Player Club Goal
2013/14 Cristiano Ronaldo Real 17
2015/16 Cristiano Ronaldo Real 16
2011/12 Lionel Messi Barca 14
2012/13 Cristiano Ronaldo Real 12
2011/12 Mario Gomez Bayern 12
2010/11 Lionel Messi Barca 12
2002/03 Ruud van Nistelrooy Man Utd 12