Monte Carlo-ah Federer chak nghal

Australian Open hnua a vawi khat nan Roger Federer chu ATP World Tour-ah a inlan ve leh thei ta a, Thawhlehni zan khan Guillermo Garcia Lopez hnehin Monte Carlo Rolex Masters third round a inhlangkai.

Swiss thiampuipa Federer hian second round inkhelah hian minute 75 chhungin Lopez lakah hian 6-3, 6-4 in hnehna a chang. Federer hi Monte Carlo-ah hian vawi li final a lo lut tawh a, ṭum hnih a chak lo zawkah ṭangin Rafael Nadal leh Stan Wawrinka a hneh lo. Tunah hian ATP World Tour Masters 1000 title 25-na tur a nghak mek a ni.

Grand Slam vawi 17 champion tawh Federer chuan, "Ka khupah harsatna ka neih loh avangin nuamti takin ka inkhel thei tawh a. Inkhel pumpui thlirin ka khelṭha thawkhat chuan ka hria a, duhthusam a ni rih e," tiin a inkhelh dana a lungawi thu a sawi.

Inkhel dang

Andy Murray pawh-in second round lut tur-in inkhel hautak a hmachhawn nghal a, Pierre-Hugues Herbert lakah 6-2, 4-6, 6-3 in hnehna a chang hram. Khawtual tlangval Gilles Simon pawhin Bulgarian Grigor Dimitrov chu 6-4, 6-3 in a hneh a, seeded pa-riatna Jo-Wilfried Tsonga pawhin Pablo Carreno Busta lakah 7-6, 7-6 in hnehna a chang ve bawk. Seeded 11-na David Goffin pawhin 7-5, 6-0 in Feliciano Lopez a hneh ve bawk a ni.