Khatla TBL-in nomawi humhim thei ang em?
Mizoram Super League season 2 final game 1 chu Zir-tawpni zan dar 8:00 hian Hawla Indoor Stadium, Republic Vengthlangah khelh a ni dawn a, champion lai Khatla TBL leh Tuikual South an inhmachhawn ang. TBL manager Lalawmpuia Pachuau chuan an nomawi humhim tura an inpeih tawh thu Vanglaini palai a hrilh.
Final game 1 thlirlawkin Awm-puia chuan, "Tuikual hian Mission Veng Vikings lakah come back ropui an lan tir thei a, team
ṭha an ni tih fiah nan a tawk. Keini lam pawh kan champion nomawi humhim thei ngei turin inbuatsaihna kan nei ngawrh," a ti.
Tun season-ah TBL hi team chungnung bik tia sawi tur an la ni bik lo mah se Pratham Singh leh India captain Vishesh Bhriguvanshi te an chhawr theih ṭum chuan offensive game khel ṭha thei ber an ni thung. State pawn player pahnih hi final game 1-ah an inlan thei dawn em tih a la chiang lo. City Police a ṭang Gospel Lalthawmmawia leh R. Lalmalsawma te hi training-na aṭanga an chhuak thei a nih chuan TBL tan state pawn player tel lo pawha thlamuan pui tham an tling. Mahse, anni pahnih pawh hi final-ah an inlan thei dawn em tih a la chiang bik lo a ni.
Amaherawhchu, hei erawh theihnghilh lo ila. TBL hian semi-final-ah khan India captain Vishesh Bhriguvanshi leh MSL1 final-a player pawi-mawh Pratham Singh te bak-ah semifinal-ah Zarkawt Serpents an hneh. Captain Van-lalnunsanga, Vanlalmuana, leh Eddie Zaithanmawia te hi an khelh-ṭhat ṭum chuan chakpui tham khawpa player ṭha vek an ni a, TBL-ah khel lo se Lalrinpuia Hlondo, David Lalrinchhana leh Jacob Laldinliana te hi rinrawl player ni thei an ni.
MVP H. Laldinsanga erawh a zam lo a, Saron Veng tlangval chuan TBL chu state pawn player-a innghat an ni lo a, thawhhona
ṭha leh inbuatsaihna ṭha chu an hmachhuan a nih thu a sawi. TBL hian final atan inbuatsaihna an nei ngawrh a, tunkar chhung hian camp an nei hial a ni.
TBL point guard Mapuia chuan, "Kan chak ngei ang tih ka sawi chiang thei lo. Mahse, hnehna chan chu kan inbeisei. Kan squad a chhah tawk lo tih chu hriatsa a ni a, final atan bik hian kan defence pawh kan inluahchah nasa bik hle," tiin Vanglaini palai a hrilh.
MSL1-ah TBL hian Tukual South hi ṭum hnih an lo hneh tawh a, MSL2 league round hnuhnung berah 94-70 in an lo hneh nawn leh tawh avangin an huphurh hran lo ang. Amaherawhchu, Tukual South hian final lut turin tun season-a thawm nei na tak Mission Veng Vikings an hneh thei a, TBL erawhin league round-ah Vikings hi 71-86 in an hneh lo thung.
Fans an pawimawh
Tualchhung basketball in ngaihven a hlawh zia ti chiang turin semifinal-ah Hawla Indoor Stadium-a leng lo khawp fans an pungkhawm ṭhin. Fan-te hi court chhungah lut ve lo mah se player-te chakna thahrui pawimawh an ni fo. Team ṭha pahnih inkhelah chuan fans nei ṭha zawk nih a hlu dawn.
TBL manager Lalawmpuia Pachuau chuan, "Khatla aṭang chauh ni loin veng hrang hranga aṭangin TBL hian ṭantu kan nei a, Tuikual South lam pawh hi fans nei ṭha an nih avangin inkhel entu chu an tam dawn chiang. Fan-te hi inkhel boruak siam theitu leh result thlenga ti danglam theitu an nih avangin an puihna kan mamawh hle," tiin a sawi.
Veng hrang hrang aṭanga
ṭantu nei TBL hian an vengchhung chauhin an ṭawiawm tia an sawi Tuikual South hi suppporter neih ṭhat lama an tluk loh chuan mualphona chi khat a ni ang.