Europa League: Champion lai Sevilla an inlan dawn
Zaninah Europa League quarterfinal second leg khelh a ni dawn a, team an inlan kim vek dawn avangin zaninah Europa League semifinal lut tur team pali a chiang dawn.
Inkhel ngaihven hlawh zual zingah champion lai Sevilla inlan tur hi football ngainatute hmuh chak a ni. Spanish club hian La Liga club ve tho Athletic Bilbao an hmachhawn dawn a, khualmualah 2-1 a an lo hneh tawh avangin an dinhmun a ṭha zawk rih.
Spanish club zingah Villar-real an inlan dawn bawk a, Czech Republic club ṭha Sparta Prague khelmualah an lenglut ang. Ukrainian club Shakhtar Do-netsk chuan Portuguese club S.C. Braga an mikhual ang a, in-khel zawng zawng hi zan dar 12:35-a in hmachhawn vek tur an ni.
Valverde a ṭang
Sevilla khelmualah Athletic Bilbao an lenglut dawn a, Eu-ropa League champion lai hi an mikhual ṭumin 2-1 a an lo hneh loh tawh avangin semifinal lut tur chuan Bilbao-in theihtawp an chhuah a ngai ang.
Athletic Bilbao manager Ernesto Valverde pawhin an dinhmun a hai lo a, "First leg-ah 2-1 a kan tlawm tawh avangin semifinal kan luhna chance hi 50% velin a tla thla tawh. Mahse, kan theihtawp tak meuh meuh kan chhuah chhunzawm ang a, semifinal luh ngei tumin kan khel ang," tiin theihtawp an chhuah tur thu a sawi.
Bilbao tana chanchin lawm-awm chu hrem vanga Sevilla central defender Ever Banega leh left-back Benoit Tremoulinas-te inlan thei lo tur hi a ni. Mahse, heti chung chung hian a zawna Europa League nomawi a vawi thum nana chawi tumtu Sevilla hi dah hniam ngawt theih an ni lo - an khelmuala Europe game an khelh hnuhnung pathumah goal an chhuah miah lo.
Mikhual team tan Aritz Aduriz bawk innghahna a ni leh dawn a, Spanish veteran striker hian tun season Europa League-ah goal kua lai khung tawhin Europe-a striker hlauhawm ber pawl a ni mek. Sevilla tlarhnung tan kum 35-a upa striker hi ven uluk a ṭul ang.
Shakhtar innghahna Taison
Shakhtar Donetsk-in khual-mualah zanina an mikhual tur Braga chu 2-1 in an lo hneh tawh a, semifinal inhlangkai turin Ukrainian club dinhmun a awhawm zawk.
Shakhtar Donetsk-in tlar-hnung lam buaina an nei a, hrem vangin defender Yaroslav Rakitskiy an chhawr thei dawn lo a, defender pahnih Vya-cheslav Shevchuk leh Marcio Azevedo-te chu an hliam a la dam chiang lo bawk.
Tlarhma lamah erawh Brazilian winger Taison a inlan thei tawh dawn a, Chelsea nena sawizawm hlawh mek winger hi coach Mircea Lucescu chuan an innghahna leh an player pawimawh a nih thu a sawi.
Lucescu chuan, "Taison hi tunah chuan kan player ṭha ber a ni a, kan tlarhma tichak tura player pawimawh ber a ni," tiin a player chu a fak hle.
Sparta Prague vs Villarreal
Villarreal-in quarterfinal first leg an khelmuala an khelh
ṭum-in Sparta Prague 2-1 in an lo hneh tawh a, khualmuala goal khat khung Sparta dinhmun a chhe lutuk bik lo.
Czech Republic club hi an khelmual hmang thiam tak an nih avangin Spanish club tan lenchilh an chakawm lo ang. Sparta hian Europa League match an khelmuala vawi ruk an khelhah tlawm hmel an la hmu miah lo, khualmuala tlawm hrat tak Villarreal tan hei hi thil hriat nuam a ni hauh lo ang.
Spanish club hian Europa League-a khualmuala an match hnuhnung pakuaah vawi khat chiah hnehna an chang thei a, Sparta khelmuala chak hi an harsat dawn.
Villarreal tana chanchin lawm-awm erawh Sparta-in an player pawimawh an chhawr thei lo nual dawn. First leg-a inlan player zingah defender pahnih Jakub Barbec leh Costa Nhamoinesu-te chu hrem vangin an inlan thei dawn lo a, Mario Holek chu hliam vangin a inlan thei dawn lo bawk.