Champions League khel tur Okazaki

Leicester City striker Shinji Okazaki chuan season thara Cham-pions League an khel tur chu a phur tawh thu leh a chak takzet thu a sawi.

Okazaki hian season ṭan dawn khan King Power Stadium hi Bundesliga club Mainz aṭangin a pan a, mainz-a a cham lai hian league match 65 a inlanah goal 27 a khung thei a ni.

Leicester tan league match 31 a inlana goal nga khungtu striker chuan Foxes a zawm tirhin a ngaihtuahnaah Champions League a awm loh thu sawiin, "Tunah chuan han suangtuah mai dan pawh ka thiam rih lo. Mahse, han khel phawt ila, Champions League chu eng ang chiah nge a nih ka hre chak a ni," tiin a phur tawh hle.

Japan tan vawi 100-a inlana goal 48 khungtu striker chuan sawi chhunzawmin, "Europe-a hun engemaw chen hmang tawh chung sia Champions League la khel lo Japanese player tlemte zinga mi ka ni a, Europe inelna sanga inlan hi ka lo suangtuah fo ṭhin a ni," a ti.

Kum 29-a upa striker chuan Champions League an khel tur chu ama mimal tan mai piah lamah Leicester City tan pawh hmasawnna ropui tak a nih thu a sawi.