Ozil-a'n a khel ṭha lo tih a pawm

Arsenal club chanchina player man to ber Mesut Ozil chuan tun hnaiah a khel ṭha tawk lo tih a pawm a, a theihna san zia pholan chhunzawm theih a inbeisei thu a sawi.

German international hian tun season-ah Premier League-ah a
ṭhian-te goal khung tur vawi 18 a siam-sak tawh a, Gunners legend Thierry Henry record (20) a tluk teuh tawh hle a, inkhelh hmabak paruk an la neihah club record thar siam theihna hun a la nei.

Kum 27-a upa Ozil chuan, "Ka khelh ṭhat ber lai a ni lo a, season tluanin ṭha taka khelh theih reng a ni lo tih pawh ka hria. Kum bul lama ka khelh ang khan ṭha taka khel chhunzawm leh turin theih-tawp ka chhuah ang," tiin a sawi.

Real Madrid midfielder hlui hi Arsenal fan-ten club hmangaih tawk lo leh club tana inpe tawk loah an ngai ṭhin a, mahse Ozil chuan Gunners tan hian 100%-a a inpek thu a sawi tel bawk.

Tun season-ah Ozil hian inelna hrang hrangah match 45 a khel tawh a, goal riat khung tawhin yellow card vawi ruk a hmu tawh bawk. North London club-ah hian kum 2018 thleng cham turin contract a nei mek.