Pardew-a'n contract thar ziah duh

Alan Pardew chuan Crystal Palace manager hna chelh chhun-zawm zel tura contract thar ziah a duh thu a sawi.

Nikum January thla khan Pardew hian Palace boss nihna a chelh ṭan a, season hmasa khan a team hi Premier League-ah 10-na a nih pui. Tun season-ah pawh bul an ṭan chhe lo a, league table-ah pangana dinhmun te an luah hman.

Amaherawhchu, tun hnaiah result ṭha an nei thei lo. Inelna hrang hrangah match 14 chhung ngawt chak ni hmel hmu loin an awm hman a, tun dinhmunah point 37 hmuin relegation zone chu point 10 in an chhuahsan rih. Match ruk chiah khelh hmabak la awm mah se an him ngei dawn em tih a la chiang bik lo.

Nikum December thla hnua a vawi khat nan kartawp khan league-ah an chak ve leh hlawl a, Norwich City 1-0 in an hneh.

Player a nih laia Palace tana season li chhung lo khel tawh Pardew chuan, "Season thara Premier League khel thei turin kan inhmatan ka beisei a, chuan contract thar pawh ka ziah ngei ka ring. A chhan chu he hmuna cham hi ka la duh a ni," tiin a sawi.

Pardew chuan beisei an la neih thu sawi zawmin, "Season chawhma lam khan kan khelṭha em em a, chawhnu lamah erawh beisei kan phak lo hle. Inrintawkna kan tlakchham rih vang a ni a, kan rilru kan tih paukhauh phawt chuan kan khelṭha chhunzawm leh thei ang," tiin a sawi.

Nizan khan Crystal Palace hian Everton chu league match khel turin an lo mikhual a, he thu ziah lai hian result kan hre hman lo.