Virat Kohli a pangngai reng

World Twenty20 khelh zawh taka player of the tournament dinhmun luahtu Virat Kohli-a'n Indian Premier League lam-ah pawh a chet ṭhat a chhunzawm zel a, Thawh-lehni zan khan Sunrisers Hyderabad an hnehna inkhelah run 75 zet a siam.

M. Chinnaswamy Stadium, Bengaluru-a inkhelah mualneitu Bangalore hian run 45-in Hyderabad hi an hneh a, Virat Kohli bakah run 82 siamtu AB de Villiers a hmuhnawm hle.

Bangalore hian over 20 chhungin run 227 an siam a, mi pali chiah an hloh. RCB tan opener Chris Gayle chuan run khat chiah siamin out mah se captain Kohli a lo dingchhuak a, ball 51-ah run 75 a vaw chhuak. AB de Villiers-a'n run 82 siam turin ball 42 lek a mamawh a, run 35 siama a tawp thleng dam Sarfaraz Khan a khel ṭha viau bawk.

Hyderabad-in an target an umna kawngah captain leh opener ni bawk David Warner-a'n run 58 siam mah se batsman dangten an pui ṭha tawk lo a, over 20-ah run 182 tlina mi paruk hlohin Hyderabad hi a tlawm zawkah an
ṭang ta a ni.

Nizan IPL-ah Kolkata Knight Riders leh Mumbai Indians inhmachhawnin an result kan hre hman lo. Zanin dar 08:00-ah Gujarat Lions leh Rising Pune Supergiants an inhmachhawn ang.