UCL Semifinal-a City hruai thlengtu Pellegrini
Manchester City-in sira an hnawl Manuel Pellegrini hoin an club history-a a vawi khat nan UEFA Champions League semifinal an thleng.
English club hian semifinal thleng turin an mual Etihad Stadium-ah Paris Saint-Germain draw chiah mamawh mah se Kevin De Bruyne goal mawi tak hmangin Thawhlehni zanah hnehna an chang. Manchester City hian PSG hi aggregate-ah 3-2 in an hneh a, Zirtawpni tlai dar 4:00-ah semifinal draw neih a ni ang.
Sawi zui tur
Kar liam ta khan Paris-ah 2-2 in an inhnehtawk a, away goal rule dan hman a nih avangin Manchester City chu dinhmun ṭha hreta ngaih a ni. Captain Vincent Kompany tel lohna City-in bul an ṭan
ṭha a, Sergio Aguero chuan keeper Kevin Trapp laka a penalty hlawhchhuah chu goal zawnah a pet lo. First leg-ah PSG thiampuipa Ibrahimovic-a'n penalty a hlah tawh bawk.
Swedish striker Ibrahi-movic-a'n ṭum hnih ṭha zetin freekick a pet a, City keeper Joe Hart-a'n ṭha takin a dang ve ve. City ṭantute tan Aguero penalty pet goal loh chu vanduaina hmahruaiah ngaih theih ni mah se an khelh ṭhat miau avangin vanduai thei an ni lo.
City wing back Gael Clichy leh Bacary Sagna ten 5-3-2 formation hmang PSG wing back Maxwell leh Gregory van der Wiel te chu first half-ah an dah ṭha a, hun chanve hnu lamah PSG-in 4-4-2 hmang mah se Arsenal wing back hlui hian Lucas leh Angel di Maria te chetna hun an siam lo bawk.
Defence laia ding Nicolas Otamendi leh Eliaquim Mangala hian tun season match hnuhnung 17 an inkawpah vawi thum chiah clean sheet an nei a, last 16-a Dynamo Kiev nen an inkhelh ṭuma minute 17 chiah an din dun chu chhiar tel a ni. Amaherawhchu PSG an mikhual ṭumah erawh City defender pahnih hian Ibrahimovic chu goal khungna chance an siam lo a, Swedish striker chance neih chhun chu goal mah se offside vanga pawm a ni lo.
Tlarhnung khelh ṭhat zanah Joe Hart-a hming lam rik tho a ṭul a, English keeper hian Ibra freekick ṭha tak a dan bakah Edison Cavani goal khung tur chu a dan sak bawk. Tlarhma lama mipuiin Aguero leh Ibrahimovic an khaikhin zanah De Bruyne a langsar ta ber a, pound maktaduai 55 man midfielder hian minute 66-naah penalty area pawn aṭangin goal mawi bik a khung. City-in Chelsea petchhuaktu PSG an hneh hian sawi zui a hlawh ang.
PSG lam
PSG chungchang sawiin French footballer hlui David Ginola chuan, "An rilru put hmang a dik lo a, an tlan tam tawk lo. PSG player-te kha an thatchhia a, Champions League quarterfinal khel tlak an ni lo. Champion an tum a nih chuan tun aia ṭhaa an khelh a pawimawh, Lauren Blanc hi an chhawr zui zel ka ring lo," a ti.
French club tana chhuanlam awm thei chu match hnihnah Marco Verratti a inlan lo ve ve a, Blaise Matuidi-a'n hrem vangin second leg a khel thei lo. Midfield rinrawl pahnih awm loh hnuah Thiago Motta chu first half tawp hma hretin a bai chhuak bawk.
PSG hian Champions Lea-gue aṭanga an tlak tak avangin tun season-ah nomawi pali an chawi thei ta lo a, Ligue 1 champion tawh Blanc-a hote hian France rama nomawi chawi theih pathum chawi an tum zui ang.
Inringtawk Pellegrini
Manchester City coach Ma-nuel Pellegrini chuan, "PSG aiin kan khel ṭha zawk a, chuvangin eng team pawh hmachhawn ila team ṭha zawk kan ni thei a ni. Chhan hrang hrang vangin sawisel tawk
ṭhin mah ila, kum tinin hma kan sawn a ni. Semifinal chinah chuan team ṭha tak vek an awm tawh a, eng team nen pawh min pawt fuh se kan hlau lo," tiin a inringtawk hle.
Amah thlaktu tur Pep Guar-diola nena inhmachhawn chungchang zawhna chu Pellegrini chuan, "Bayern Mu-nich hi team pakhat an ni ve mai a, an danglam chuang lo. Bayern hian semifinal an thleng a nih chuan team khirh tak chu an ni ngei ang. Ka hmalam hun leh zanina kan chak hi sawi zawm ka duh lo. Kei chuan hmasawnna neih zel hi ka duh a, Europe-a result ṭha zawk kan nei hi ka lawm a ni," tiin a sawi.