AFC Cup last 16-ah Mohun Bagan

Nimin khan Mohun Bagan chu AFC Cup-ah chak zo lo mah se last 16 an lut chiang tawh. Kolkata club hian khualmualah Yangon United chu 1-1 in an inhnehtawkpui a, match hnih lai khelh tur la awmah second round an lut.

Myanmar club tan Corinthians striker hlui Adilson Dos Santos chuan minute 26-naah goal hmahruai a khung a, Bagan tan Cornell Glen chuan minute 42-naah mikhual team tan an si phurh hi a sut. Hun tawp thlengin goal dang a lut tawh lo a, team pahnih hi point khat ve veah an lungawi a ṭul.

Mohun Bagan tan Jeje Lalpekhlua'n inkhel bul a ṭan a, AFC Cup khelh meka goal nga khung tawh striker hian minute 19-naah goal khung theihna hun ṭha nei mah se Yangon keeper Luiz Fernando chuan Hnahthial tlangval ball tauh hi ṭha takin a lo dang a ni.

Nizan khan Group G inkhel dangah Maziya leh South China te an in-khel a, result kan hre hman lo. Mariners hian AFC Cup-ah result ṭha tak an nei a, I League-ah erawh champion no-mawi humhim turin vanneihna an mamawh. Mariners hian tunkar hian I League-ah match khelh tur an nei lo a, Pathianni zanah Bengaluru FC-in an mualah Salgaocar an hneh chuan Bagan champion bei-seina tihtawpin a awm ang.