Jurgen Klopp-a mikhual tur Dortmund

Jurgen Klopp-a'n zanin dar 12:35-ah a club hlui Borussia Dortmund chu Anfield-ah a lo mikhual dawn a, Liverpool manager hian a team hlui lakah ṭhat chhuah a tum dawn lo.

Signal Iduna Park-a Europa League quar­terfinal first leg an khelh ṭumin team pahnih hi 1-1 in an lo inhnehtawk tawh a, khualmuala goal khat nei sa Liverpool tan semifinal lut turin goal chhuah loh a tawk.

Mahse, Borussia Dortmund-in Europa League-a goal 10 khunga top scorer ni mek striker Pierre-Emerick Aubameyang leh goal riat khungtu Marco Reus an kawl avangin Reds tan goal chhuah loh ngawt hi thil awlsam a ni dawn lo.

Liverpool-in tun season Europa League-a match 11 an khelh tawhah tlawm hmel an la hmu lo a, an record neih ṭhat sa hi an khelmual ber khera thai chhiat an duh dawn loh avangin Dortmund hna a hautak dawn.

Hendo tel loin

Signal Iduna Park-a Reds an lenluh ṭumin captain Jordan Henderson chu hliam vangin lakchhuah a ni a, English midfielder hi tun season chhung a inlan dawn loh avangin an captain tel loin Reds an khelh a ṭul ang.

Henderson aiah hian Stoke City laka khel ṭha tak Joe Allen chuan inkhel bul a ṭan a beiseiawm a, hrem vanga Stoke hmachhawn thei lo Emre Can a inlan thei tawh bawk ang.

Dortmund tan first leg-a a hliam dam kawr avanga an la chhawr ngam loh an midfilder pawimawh Ilkay Gundogan a dam chiang tawh a, German club tan chanchin lawmawm a ni.

Khaikhinna

Liverpool-in Europe inelnaa an match hnu­hnung pasarihah tlawm hmel an hmu tawh lo a, Anfield-a lenchilh hi an châkawm loh. Hetihrual hian Reds tan Dortmund hi lo zuam ngawt chi an ni bik lo.

German club hi an mikhualna ramah an tlangnel thei hle. Tun season Europa League-ah third qualifying round an khelh avangin khualmualah match sarih ngawt an khel a, match nga a chak zawkah an ṭang thei. Match khat an khingpui inhnehtawkpuiin vawi khat a tlawm zawkah an ṭang thung.

Klopp-a buaina

Liverpool manager Jurgen Klopp-a'n buaina a nei a, a buaina erawh a ṭha lam a ni. Tun hnaiah Liverpool striker pahnih Daniel Sturridge leh Divock Origi-te an khel ṭha takzet a, German coach hi duhthlangin a buai!

Dortmund khelmuala an inhnehtawk ṭumin Origi-a'n inkhel bul a ṭan tawh a, a team tan goal khat hlu tak a khung. Europa League match zawhah league-ah minute 45 inlanin goal hnih a khung bawk a, Klopp-a tan Belgian striker en kan hi a harsa dawn.

Sturridge-a'n Stoke City 4-1 a an hneh ṭumin goal khat a khung a, a hliam a dam tawh tih a lantir bawk. Luis Suarez nena Reds tana ropui taka lo khel tawh Sturridge hi ball a thiam bakah player fing tak a nih avangin bench-a ṭhu tur chuan a uiawm.

Klopp chuan, "Ka player-ten hetianga an khel zel a nih chuan ka tan thutlukna siam a harsa a ni. Hetiang huna thutlukna siam hi nuam ti lo mah ila manager tan chuan a lawmawm em em lawi si. Dortmund kan mikhual hunah pawh thutlukna harsa tak chu kan siam a ngai dawn a ni," a ti.

German coach hian Sturridge leh Origi chu an khelh dun theih tho thu Stoke an hneh hlimin a lo sawi tawh bawk a, zaninah a ruala a luhtir a nih pawhin a mak lo ang.

Players thukhawchang

Hendo awm loh laia Reds captain James Milner chuan Dortmund mikhual tura an phur tawh thu sawiin, "Player tupawhin game ropui bik hi chu khelh an châk ṭhin a, Anfield-a European game hi chu a tenau tak tak thei lo," tiin a phur hle.

Milner chuan sawi chhunzawmin, "Dortmund nena kan inkhel tur hi a pawimawh takzet dawn a, mah se kan fan-te vangin kan chak ka ring. A chhe ber ngaihtuah chungin hma takah goal rawn khung mah se fan-te puihna liau liauin kan hneh thei ang. Fan-te auh phurna avangin vawi tam kan lo chak tawh a, zaninah pawh hian chu chu a thlen ka beisei a ni," tiin fan-te chungah an innghah thu a sawi.

Pathianni zan Bundesliga-ah Dortmund-in Schalke chu 2-2 in an inhnehtawkpui a, coach Thomas Tuchel-a'n Liverpool nena an inkhel tur thlirlawkin a player ṭha zawkte a chawlh hahdamtir.

Dortmund defender Matthias Ginter chuan, "First leg aṭang khan Liverpool hi team ṭha tak an nih zia kan hrechiang tawh a, zaninah pawh hian a harsa dawn. Result ṭha tak kan hlawh chhuah theih ngei ka beisei," tiin Anfield-ah chak an tum thu a sawi.