Madrid derby: Atletico mikhual tur Real

Spanish football-ah El Clasico-in ngaihven a hlawh ber a, a dawta inkhel ngaihven hlawh chu Madrid derby a ni. 

Zanin dar 1:30-ah Madrid derby en tur a awm dawn a, Real Madrid chuan Atletico Madrid an mikhual dawn - inkhel a hmuhnawm loh ring suh. 

Atletico Madrid hian beisei angin season bul ṭan lo mah se tunah erawh La Liga-a champion tura rin kai ber an ni leh der tawh a, a awlsam dawn lo. 

Real Madrid-in tun season-ah beisei phak lo mah se Borussia Monchengladbach lakah boruak sanga an ṭhat ṭhinzia kan hmu tawh a, Atletico tan zuam ngawt a fuh lo ang. 

Diego Simeone enkawlna hnuaiah Atletico Madrid-in tun season La Liga-ah tlawm an la nei lo a, match 10 khel tawhin vawi riat an chak a, vawi hnih an khingpui an inhnehtawkpui. 

La Liga table chung berah Atletico an awm mek a, an hnuai chiaha awm Real Sociedad aia match hniha khel tlem chungin point khat lekin an hnufual zawk. 

Atletico hian season bul ṭan nan an match hmasa berah Granada chu 6-1 ngawtin an sawp a, mahse, anmahni faktute fakna chil per pawh a reh fel hmain league match zawna an khingpui inhnehtawkpuiin goal an khung lo. 

Simeone-a enkawl team an ni miau a, Atletico an mutthlu rei lo thung - league match sarih chhung a zawnin hnehna an chang leh tawh a, Real tan mikhual an châkawm loh vanglai tak a ni ang. 

Barcelona-in an club tana khel turin Luis Suarez chu a ṭha tawk tawh loah an ngai a, a puanthuah tel turin an hriattir. Barca âtna chu Atletico lawmah a lo tla a, Suarez an lalut chat. 

Kum 33 mi striker hian league match sarih a khelhah goal nga khung tawhin assist vawi khat a nei a, tawnhriat a neih ṭhat bawk avangin Real Madrid tan ven uluk ngai tur zinga mi a ni. 

Pound maktaduai 113 man Joao Félix-a'n a man phu ang zatin a khel chhuak ṭan a, European football-a forward hlauhawm ber pawl a ni der tawh - tun season-ah match 16 khelin goal riat a khung a, assist vawi thum a nei tawh. 

Chutihrual chuan Real tan player pahnih ringawta  rilru pek lutuk chu chetsual theihna a ni tih hriat a ṭha a, an ṭhenawm club hi Yannick Carrasco, Koke, Ángel Correa leh Saul Niguez-te neitu an ni tel tih hriat a ṭha - Diego Costa chu hliam vangin a chawl mek thung. 

Zinedine Zidane enkawlna hnuaiah Real-in season ṭha an hmang lo - an league match hmasa berah Real Sociedad chu goal khung loin an inhnehtawkpui nghal a, mahse, a zawna match thum an chak zui avangin an insiamṭhaah ngaih a ni. 

Mahse, Real an insiamṭha lo - an mualah rin loh takin Cádiz chu 1-0 in an ngam lo zui a, an league match hnuhnung pasarihah vawi thum chiah chak an nei thei!

Champions League-ah thawnthu a danglam tam lo. An match hmasa berah  Shakhtar Donetsk chu 3-2 in an ngam lo nghal a, Gladbach lakah 2-0 a an hnufual reng hnuin 2-2 in an inhnehtawkpui hram. 

Khawthlang media-ah chuan Zinedine Zidane chu a hna aṭangin a chawl dawn niin an sawi hman hial a, French manager hi a insawifiah a ngai hial - an dinhmun a ṭha lo tih a chiang. 

Mahse, Zidane-a hnuaia Real dang-lamna nia an sawi ṭhin chu hun harsaah an talbuai ngai lo a, game boruak sangah an vul leh ṭhin hi a ni.

Champions League-a an match hnuhnung berah Real Madrid hian last 16 lut tur chuan chak ngei ngei an mamawh a, Gladbach khelmualah 2-0 a hnehna changin group hmahruaitu an ni daih!

German club laka an chak hma hian league-ah Sevilla chu 1-0 in an hneh bawk a, Real phur vanglai tak a ni - Madrid derby boruak sangah an theihna an pholang a nih pawhin mak ti suh!

Real tan hliam vanga a chawlh hnuah Federico Valverde chuan training a zawm leh tawh a, Martin Odegaard leh Eden Hazard-ten dam lam pan mah se training pangngai erawh an la zawm thei lo thung. 

November 8 hnua a vawi khat nan Karim Benzema chuan goal a khung leh ta a, Real tan hei lo liama chanchin lawmawm a awm chuang lo - Gladbach lakah goal hnih a khung. 

Benzema hian Champions League group stage-ah goal 50-a khung tling tawh a, Lionel Messi (71), Cristiano Ronaldo (67), Raul (53) leh Ruud van Nistelrooy (50) hnung a zui. 

French striker chunga striker hming en i la, legend huangah a awm - boruak sangah a talbuai ngai lo a, Real tan a vul leh ṭhin. Zaninah pawh Atletico tan ven bik sual lo tur striker a ni - tun season match 14-ah goal riat khungin assist vawi thum a nei a, a hmaa ding tur hi Jan Oblak a ni tih erawh hriat a ṭha. 

Real Madrid midfield-a Toni Kroos, Luka Modric leh Casemiro inkawp hi eng team mahin hmachhawn an la châk lo ang tih a lang reng a, tlarhnungah Sergio Ramos-a la awm cheu bawk.