MSL9 Finals Zarkawt BCA an chak hmasa; Zaninah Game 2

Mizoram Super League season 9 Finals khelh mek a ni a, game 1-ah Zarkawt BCA chuan Khatla TBL lakah 95-80 in hnehna an chang a, best of three series khelh turah 1-0 in hma an hruai.

Zanin dar 8:00 hian R. Dengṭhuama Indoor Stadium, Mualpuiah game 2 khelh a ni dawn. BCA tan champion turin vawi khat chak leh a tawk - TBL tan erawh beiseina tinung turin tlawm a thiang lo, inkhel a hmuhnawm dawn.

Tualchhung basketball inelna lian leh ngaihhlut hlawh ber hi Zonet chuan live-in a pe chhuak ṭhin a, zaninah pawh a pe chhuak leh ang. A hmuna en duh tan hma takah Mualpui pan mai tur a ni ang.

Game 1-ah a hmuna inkhel entu an ṭhahnem, chutihrualin Kohhran ṭhalai inkhawm zan a nih avangin ṭhutna awl a la awm nual. Zanin hian TBL lamin tho chhuak turin fans puihna an mamawh a, BCA lam hi champion lawm tumin an kal thung dawn. Mipui an tam dawn tih a chiang.

Inkhelh hma boruak

Zarkawt BCA hian league round-ah an khingpui zawng zawng an hneh a, chak vek chungin final hi an lut. Inrintawkna nei sang hle mah se, ram pawn aṭanga an player chah luh Emmanuel Malou chu chhungkaw chhiat tawhna avangin an ramah a haw.

Malou-a thlaktu tur lakluh an dil a, mahse a remchang lo. Tournament ṭan dawna an ziah luh sa - Indian player ṭha Amritpal Singh erawh a rawn inlan thei thut thung, league round lamah tel lo mah se final boruak a rawn nang. Feet sarih leh inch khata sang Amritpal hi team pahnih danglamna a ni.

Khatla TBL lamin Vanlalṭhazuala an chhawr thei tawh. Ṭhazuala hi Bungkawn LB nen league match an khelh ṭuma inhliam kha a ni a, semifinal-ah chhawr thei lo mah se inkhel pawimawh atan khek a ni a, a hunah tak a rawn inlan.

Coach pahnih H. Lalhruaitluanga leh Marc Lalthlamuana Sailo ten inkhelh hmain chak an tum thu Vanglaini an hrilh ve ve a, a tir aṭangin an naute an rem fimkhurin chak an tum tih a lang chiang hle.

BCA chak phawt

Zarkawt BCA hian tualchhung player an nei ṭha, an chak chhan pawh a ni ṭhin. Mahse, final meuh chu tualchhung player chauha hmachhawn an zuam bik lo tih a lang a, season danga tawnhriat nei tawh Amritpal Singh chuan ball a hmu hnem.

Amritpal-a hian a chunga mawhphurhna tla a hlenchhuak ṭha, minute 38 khelin BCA player zingah court chhunga awm hnem ber a ni. Point 25 neiin rebound vawi sarih a la, a laka beiseina an neih ang ngeiin a khel chhuak. India international player Amritpal hi a lian ringawt lo a, a thiam tel. Amritpal zarah BCA-a Mizo player-ten zalen takin an khelh theih phah.

Lalrina Renthlei-in final boruak sangah a theihna sang tak a rawn lantir thei a, Tuikhuahtlang star hian point 17 neiin Zonunsanga (16) leh Lalnunpuia Renthlei (R-a) ten an thlawp ṭha hle bawk a, dinhmun ṭha zawka an din theih chhan pawh a ni.

Zarkawt BCA coach Marc Lalthlamuana Sailo chuan, "Kan chak chhan ber chu kan thawhhona ṭha leh ṭanrualna vang a ni. Pathian zarah game 3 khel ngai kher loa tlang kan tum," tiin Vanglaini a hrilh a, zaninah champion tlang ngei an tum.

BCA player tam zawkin tawnhriat an nei ṭha a, champion fo tawh an ni. Tun season-ah player thar an nei nual, R-a an la lut thei hi an vannei. MSL9-ah BCA tan R-a hian tha a thawh hlawk ṭhin a, TBL tan ani hi ven tham a ni.

TBL an zam lo

Mizoram Super League hmasa pahnihah an champion a, season hmasa khan a lungthu kim nan MSL nomawi an chawi - an champion hmasak leh hnuhnung inkarah hian BCA chu vawi li ngawt an lo champion hman.

Tun seaosn-ah BCA an champion leh a nih chuan an kal fal dawn a, hei hi Khatla TBL tana thil hriat nuam lo leh hmuh hrehawm a ni dawn, an hneh let a nih erawh chuan an champion zat a inang chiah dawn thung.

TBL coach H. Lalhruaitluanga chuan, "Game 1 aia ṭha zawkin game 2-ah khelh kan tum, inelna hi a la tawp lo," tiin 'comeback' ngei an tum thu Vanglaini a hrilh a, tawnhriat a neih ṭhat avangin BCA tan ngaihṭha taka awm a la rem bik lo ang.

Joshua Aaron Keys hi season hmasa an champion pui kha a ni a, tun finals game 1-ah pawh point 23 a nei. Point 18 neitu K. Lalthianghlima a rintlak a, damkawr Ṭhazuala (13) hi ṭha leh zual zawka a khel a nih chuan danglamna thlentu a ni thei.

Game 1 kan thlir chuan BCA lamin hma an hruai fal lai ber chuan point 22 ngawtin an sang thei. TBL lamin time out an nei chung pawha an insiamṭha thei mai lo kha an ngaihtuah nawn a ngai, a bul ṭan fuh tawk loh an tuar bawk.