Tlai ni nemah Armed Veng vs Kawnpui

Mahindra XUV3OO LPS Cup hmawr bawk a hnai a, vawiinah quarterfinal inkhel hmuhnawm en tur a awm dawn - tlai dar 4:30 hian Armed Veng leh Kawnpui Jt. an inhmachhawn dawn a, inkhel a hmuhnawm ang.

Khua leh veng inelna football a nih chuan Armed Veng an langsar ṭhin a, tun ṭumah pawh champion an tum. Mahse, round of 16-ah Durtlang chu penalty hmangin an hneh thei hram a, Kawnpui Jt. lakah a harsa zual dawn.

Mizo coach lar K. Malsawmkima enkawl Kawnpui Jt. hian nikum YMA football-a semifinalist, champion beisei ngam Salem Veng chu last 16-ah 3-1 in an hneh thei a, an inringtawk sawt dawn - inkhel hmuhnawm en duh tan Rajiv Gandhi Stadium pan mai tur a ni.

Zan dar 8:00-ah quarterfinal match hnuhnung ber khelh zui tur a ni a, Ramhlun South leh Vaivakawn an intawng ang. Ramhlun S-in Aizawl DFA hnuaia inter village football-ah tawnhriat an nei ṭha a, champion an tum.

Ramhlun S hian 2013 leh 2014 khan a zawnin champion nomawi an chawi a, kum 2015-ah a zawna vawi thum champion-na chance neiin final lut mah se, Armed Veng an ngam lo. Mahse, kum 2018 khan champion nomawi an chawi leh a, kum nga hnuah champion an tum leh mek - round of 16-ah meuh pawh harsatna nei loa 5-0 a Bethlehem hneh thei an ni.

Vaivakawnin Ramhlun S laka hnehna chang turin an theihna zawng zawnga an beih a ṭul dawn a, veng leh veng inelnaa champion nomawi la chawi ngai lo Vaivakawn hian Ramhlun South an hneh theih chuan champion an beisei ngam ang - round of 16-ah 2-1 in Kulikawn an hneh.

Nimin quarterfinal inkhel hmuh-nawmah Bethlehem Vengthlang chuan x-x in Sialhawk an hneh a, semifinal an lut. Nizana Thenzawl leh Sihphir Venghlun inkhel erawh an result kan hre hman lo.