Chelsea lawmna thlentu Palmer

Thawhṭanni zan khan Premier League club zinga sum ngah pahnih Chelsea leh Newcastle United te Stamford Bridge-ah an inhmachhawn a, Cole Palmer-a chet ṭhat zarah mualneitu Blues 3-2 in an chak. Mauricio Pochettino hote hi tun season-a vawi 11 an chakna chauh a ni a, table-ah pawh 11-naah an awm.

Blues hi an chunga awmte aiin match khatin an khel tlem a, an khelh hmabakah hnehna an chang a nih chuan, khelh zat inangah pariatnaa awm Brighton & Hove Albion an nih rual thei ang.

1-1 phawt

Minute rukna lekah Chelsea midfielder Palmer-a'n box pawn aṭangin a pet a, Nicolas Jackson-a'n khawih peng zeuhin goal an khung nghal. Jackson-a'n a khawih miau avangin Chelsea forward khunga dah a ni.

Chelsea an khel ṭha chhunzawm a, mahse box chhung an thlen theih loh avangin box pawn aṭanga Palmer leh Jackson-a te ball pet chu keeper Martin Dubravka tan buaina tham a tling lo.

Blues tlarhnung ṭul loah an che buai a, minute 43-naah mual laia ball an hloh hnem hret avangin hrem an ni. Magpies forward Alexander Isak-a'n a thiam thil a pholang a, box pawn chiah aṭangin goal kilah a dah. First half-ah vek Raheem Sterling-a'n Blues hmahruaina khung theihna remchang a nei a, goalkeeper zawnah a pet.

Palmer a langsar

Newcastle-in Miguel Almiron hmangin second half ṭan chiahah Blues keeper Dorde Petrovic hna an siam nghal a, inkhel a nung nghal. Mualneitu lamin Sterling hmangin Magpies tlarhnung an rum ṭhaih a, minute 57-naah Palmer-a'n hmahruaina goal a khung.

Manchester City aṭanga Chelsea zawmtu Palmer hian box pawn aṭangin goal kilah kawh zetin a pet goal. Newcastle-in si phurh sut tumin an nawr na a, Chelsea-in counter attack hmangin an chhu let thung.

Minute 76-naah Jackson leh Conor Gallagher te thawhrah sengin, Mykhailo Mudryk-a'n Newcastle tlarhnung a su tlang a, goal ṭha zet a khung zui. Chelsea-in 3-1 in hma hruai mah se nuam sain an chak lo. Minute 90-naah Magpies tan Jacob Murphy-a'n kawh zetin a pet goal a, mikhual team hian na takin nawr chhunzawm mah se goal dang khung turin hun an nei tawh lo a, 3-2 in inkhel a tawp.

Hello, Euro 2024

Kumin hi European Championship khelh kum a ni a, Germany-in an thleng dawn. Chelsea tan Champions League khelh beiseiawm tawh lo mah se player tan chuan ram tana khel pha turin theihtawp an chhuah a la ṭul. Chelsea leh Newcastle inkhel hi England coach Gareth Southgate-a'n a en a, Palmer-a che vel hi a hmuh hmaih lo ang.

Palmer hian kumin nipui khan Man City aṭangin Chelsea hi a zawm a, Premier League-ah goal 11 khung tawhin assist vawi riat a nei der tawh. Tun season-ah ṭum nga lai match khatah goal leh assist a nei kawp a, Newcastle an hneh ṭumah hian minute 87-naah thlak niin a khelh danah an lawm tih lantir nan Chelsea ṭantute thawm a ring hle.

Nikum November thla khan Palmer hi England tan a vawi khat nan a inlan a, tun thlaa international break awm turah pawh Manchester City midfielder hlui hi Three Lions tan a inlan ngei a rinawm.

Newcastle an buai

Season liam ta khan Newcastle hi a sang pali zingah an awm a, tun season-ah erawh top 10-ah an la inhamtang hram hram. Eddie Howe-a hote hian 1986-87 season hnua a vawi khat nan Blues hi season khata vawi hnih hneh an tum a, an hlawhchham ta thung.

Minute 34-naah Anthony Gordon chu hliam vangin thlak a ngai a, second half-ah hliam vang thoin Dan Burn lakchhuah a ṭul leh bawk. Magpies hian chawn hliam vangin Kieran Trippier an chhawr thei lo a; Callum Wilson, Joelinton leh Nick Pope te hliam vangin an la chawlh rih a ṭul dawn.

Newcastle United hian March 16, Inrinni zan dar 11:00 hian FA Cup quarterfinal-ah champion lai Manchester City an hmachhawn dawn a, Etihad Stadium-ah an inkhelh dawn bawk avangin hmabak a êng lo hle.