Atletico-in Inter an lehthal thei ang em?

UEFA Champions League last 16-ah zanin dar 1:30 hian Atletico Madrid-in Inter Milan an mikhual dawn. San Siro-ah Inter hi 1-0 in an chak a, Atletico tan extra time thleng tur pawhin goal khung ngei a ṭul. Chutihrualin away goal rule a awm tawh lo a, inkhel pahniha goal khung tam zawk an chak dawn.

Arnautovic a tel dawn lo

San Siro-a team pahnih inkhelh hmaa hming langsar pahnih chu Marcus Thuram leh Lautaro Martínez te an ni a, mahse FIFA World Cup final khel thei pahnih hian Atletico tlarhnung an su hawng thei lo.

Italian club tana lawmna thlentu chu bench aṭanga lut Marko Arnautovic a ni thung a, Stoke City leh West Ham striker hlui hian a luh hnuah Atletico tlarhnung tan hna a siamsak nasa hle. Minute 79-naah Arnautovic hian goal awmchhun a khung a, Inter 1-0 in an chak.

Zaninah erawh San Siro-a goal awmchhun khungtu Arnautovic hi chawn hliam vangin a inlan thei dawn lo. Thuram leh Lautaro Martínez te chungah bawk Inter an innghah a ṭul ang.

A hmuhnawm dawn

Inter dinhmun hi ṭha hret angin ngaih theih mah se Atletico hi tun season-ah team pahnih ang deuh an ni a, khualmuala result ṭha nei tawk lo mah se an mualah erawh team ṭha bik an ni.

Diego Simeone hote hian an muala La Liga match 25 an khelhah chak loh an tawng tawh lo. Chutihrualin inhliam vangin Antoine Griezmann a dinhmun a chiang lo a, French forward hi a tel thei lo a nih chuan Alvaro Morata leh Memphis Depay ten mawhphurhna an lak a ṭul ang.

Inter hian season ṭha tak an hmang a, Serie A-ah phei chuan an hmelma AC Milan aia point 16 ngawta an san tawh avangin an champion ngei a rinawm tawh. Nerazzurri hian kum 2024 hi an hmang ṭha lehzual a, match 13 an khelhah an chak vek bakah February thla khan Serie A-ah match li chhung a zawnin goal li a khung. Simone Inzaghi hote hian inrintawkna nen Madrid an pan ang.