Ronaldo awmna Al Nassr an tla

Al Nassr-in Cristiano Ronaldo nei mah se Asian Champions League quarterfinal an lut phak lo, an khingpui Al Ain chu penalty shootout-ah 3-1 in an ngam lo.

First leg-ah Al Nassr hi 1-0 in an chak lo. Thawhṭanni zan khan Al Nassr khelmual Al Awwal Stadium-ah second leg khelh a ni a; Al Ain hian goal hnih an khung belh a, aggregate-ah 3-0 a ni chiah. Al Nassr an tlawm duh lo a; Abdulrahman Ghareeb (45+5'), Khalid Eisa (51') leh Alex Telles (72') te hmangin an chhanglet.

Hun pangngaiah Al Nassr 3-2 in an chak a, aggregate-ah 3-3 in an inhnehtawk. Extra time khelh a ni a, Al Ain-in Sultan Al-Shamsi hmangin an khung hmasa a, Ronaldo penalty hmangin Al Nassr-in an sut. Penalty shootout hmanga chak zawk zawn zui niin Al Nassr player zingah Ronaldo chauhin a khung a; midang pathum - Otavio, Alex Telles leh Marcelo Brozovic ten an hlah vek. Al Ain aiawha pettuten an khung vek thung a, 3-1 in an chak. Ronaldo telna Al Nassr chu AFC Champions League aṭangin an tla.