Number 123 Nardi lakah Djokovic chak lo

Nomawi an chawi zat, an ranking leh sulhnu ropuite khaikhin chuan Novak Djokovic hi Luca Nardi tan chuan cho phak rual loha lian leh sang a ni a, mahse Nardi-a hian mak tak maiin a hneh miau si!

Nimin zing Indian Wells third round inkhelah world number 123 Nardi-a hian world number 1 Djokovic hi 6-4, 3-6, 6-3 in a hneh a, tennis a khelh hun chhunga hnehna a chan ropui ber a ni hial.

Grand Slam dawta inelna ngaihhlut Masters 1000 huangah Djokovic hian player langsar lo a hneh lo mai mai ngai lo, tun ṭum a chak lohna hi a ngam loh player zinga ranking hniam ber a ni.

Italian tlangval Luca Nardi chuan, "A nihna tak sawi chuan Novak Djokovic nen kan inkhelh hma kha chuan tumah hian min hriat ka ring lo, tunah chuan thil mak tak mai a thleng, ka tan chuan inkhel hriatreng tawh tur a ni ang.

"Kum 20 mi ka ni a, tawnhriat ka ngah loh bakah mite anga ṭha ka ni lo. Chutiang chunga Novak hneh chu ka tan thil mak a ni," tiin mumang rama a chen thu a sawi, a match lehpekah chuan Tommy Paul nen an inkhel leh dawn a ni.

A nihna takah chuan Nardi hi Indian Wells khel phak lo tur a ni, qualifying round hnuhnung berah David Goffin a hneh loh avangin a zinkawng a tawp, mahse world number 30 Tomas Martin Etcheverry a inhnuhdawh avangin vannei takin a inlan leh thei hram, tun hun hi a thleng zui ta hial.

Inkhel dangah kum 37 mi Gael Monfils chuan Cameron Norrie chu 6-7(5), 7-6(5), 6-3 a hnehin last 16 a inhlangkai a, a match lehpekah Arthur Fils hnehtu seeded palina Casper Ruud a tum leh ang.

Seeded pasarihna Holger Rune pawhin Lorenzo Musetti lakah 6-2, 7-6(5) in hnehna a chang a, seeded 17-na Paul chuan Ugo Humbert chu 6-4, 6-4 a hnehin round sang zawk a inhlangkai ve bawk a ni.