Bournemouth khelmualah dam khawchhuah tum Luton Town

December 16, 2023 zan khan Bournemouth-in Premier League match-ah Luton Town an mikhual a, mahse, inkhelh laklawh laia nikhaw hre loa Luton defender Tom Lockyer a tluk avangin inkhel hi tihtawp zui a ni.

He thil a thlen hi minute 59-na a ni a, team pahnih hi 1-1 in an inhnehtawk mek. Luton tana minute thumna leka Elijah Adebayo goal khung chu Cherries tan Dominic Solanke chuan a chhanglet.

Mahse, inkhel tihtawp a ni miau a, zanin dar 1:00 hian khelh ṭhat tur niin Cherries khelmualah Luton Town an lenglut ang - Premier League kai thar Luton tan thih leh dam kar tia sawi theih hial khawpa match pawimawh a ni tawh.

Cherries pawhin relegation zone an tlansanna hi point 11 a ni a, zaninah an chak chuan point 35 an nei dawn a, him turin chak an la mamawh ve tho - season hmasa relegate zinga point hmu sang ber Leicester City khan point 34 an hmu a, a hma chiah season-a hmu sang Burnley khan point 35 an hmu.

A uiawm

Cherries leh Luton intawn hmasak, an tihtawp tak kha Bournemouth tan a uiawm zual. An 'form' vanglai tak a ni a, khatihlai khan league match nga chu tlawm loa an kaltluan lai a ni a, khami hnuah khan league match hnih a zawnin an chak leh bawk.

Form vanglai taka an inkhel tihtawp a ngai a, zaninah Luton an mikhual leh dawn - tun ṭum erawh an league match hnuhnung pakuaah vawi khat chiah an chak! Vawi li an tlawm a, vawi li draw an nei.

Hei mai a ni lo. An league match hnuhnung berah table mawngphah luahtu Sheffield United chu 2-2 in an inhnehtawkpui a, 2-0 a an hnufual hnuah si phurh sut zoin an comeback thei hram a, striker chhuanvawr Dominic Solanke chuan penalty a hlah bawk.

Liverpool striker hlui hian tun season inelna hrang hrangah match 31 khelin goal 16 a khung tawh a, Sheffield laka a hming ṭha lo thaichhe turin zaninah goal khung tumin a khel ang.

Luton beiseina

Tun season-a Premier League match 27 an khelh tawhah Luton Town-in vawi nga chiah hnehna an la chang ve a, an league match hnuhnung pangaah chak an nei lo - vawi li an tlawm a, vawi khat draw an nei.

Mahse, draw result an neih hi an match hnuhnung ber a ni a, khualmualah Crystal Palace chu 1-1 in an inhnehtawkpui. Hun pek belh minute ruknaah Cauley Woodrow chuan si phurh sutna goal hi a khung a, Luton an phur thar.

Him an duh chuan Luton tan chak a ṭul tawh hrim hrim. Table-ah 18-na an ni mek a, an chung chiaha awm Nottingham Forest chu point thumin an phak lo mek - an hmabakah Tottenham Hotspur, Arsenal leh Manchester City te an la awm bawk si a, tawlhthluk a thiang tawh lo.

Chumi tur chuan tun season Premier League-a goal riat khungtu Carlton Morris mawhphurhna a sang dawn a, goal kua khung tawh Elijah Adebayo a la inhliam avangin tawnhriat nei ṭha Ross Barkley-a'n mawhphurhna a lak thiam a ṭul bawk ang.