Jokic hoin Nuggets tho chhuak

Point 22 ngawta an hniam fal hnuah Denver Nuggets an tho chhuak a, player ṭha Nikola Jokic-a awmna team hian nimin zing khan an khingpui Toronto Raptors chu 125-119 in an hneh.

Nuggets tan Serbian tlangval Jokic-a'n point 35 ngawt a nei a, rebound vawi 17 a lak bakah assist ṭum 12 neiin Most Valuable Player vawi hnih ni tawh hian tun season chhunga a vawi 21 nan triple-double a nei.

Denver centre Jokic chuan, "Tlawm mai chi kan ni lo, kei leh ka ṭhiante hi chuan a tawp thlengin kan bei ṭhin a ni tih a takin kan lantir leh ta," tiin a sawi a, ani bakah hian point 26 neitu Jamal Murray a langsar hle bawk.

Inkhel dangah Boston Celtics chuan Portland Trail Blazers lakah 121-99 in hnehna an chang a, NBA team zingah tun season chhunga vawi 50 chak tling thei hmasa ber an ni. Jaylen Brown (27 points) leh Jayson Tatum (26) ten an team hi hnehna an chanpui a ni.

Golden State Warriors tan Klay Thompson chu inkhel bul ṭantu zingah tel leh thei tawhin, ani hian point 21 a neih hmangin Golden State chuan San Antonio Spurs chu 112-102 in an hneh.

Kevin Durant, Devin Booker leh Bradley Beal te awmna Phoenix Suns pawhin 117-111 in Cleveland Cavaliers an hneh, an player ṭha pathumten point an neih belhkhawm hi 88 ngawt a tling.