Raducanu zinkawng a tawp

Beisei han nei sang chho viau mah se Emma Raducanu tan thil a awlsam lo, nimin zing khan Britain nula hian Aryna Sabalenka chu 6-3, 7-5 in a hneh lo.

Inelna neih lai Indian Wells-ah Raducanu hi a match hmasa pahnihah nuamsa takin a chak, third round erawh a harsa. Seeded pahnihna Sabalenka hi a service vawi khat chu chhuhsak thei mah se, vawi thum ngawt a hloh avangin a tlawm zawkah a ṭang.

Kum 21 mi Raducanu hian rin loh tak maiin US Open nomawi a chawi tawh a, a tawn san lai chuan world number 10 pawh a ni hman. Mahse, hliam vanga a inkhelh mumal loh rei bakah a inkhelh chhunah result a nei ṭha tawk lo, tunah chuan number 250 a ni.

Raducanu chuan, "Chak lo mah ila ka khel ṭha hleah ka ngai, tun tournament ka khelh dan leh Aryna ka hmachhawn dan kha a ṭha ka ti, match hautak pawh ṭha takin ka khel ve leh thei tawh tihna a ni," tiin a sawi.

Inkhel dangah Coco Gauff erawh a chak. Seeded pathumna Gauff hian Italian nula Lucia Bronzetti chu 6-2, 7-6 (7-5) in a hneh a, Grand Slam vawi li champion tawh Naomi Osaka hnehtu Elise Mertens a hmachhawn leh dawn a ni.