Kar li chawl tur Ederson

Manchester City goalkeeper Ederson chu a malpui tihrawl hliam vangin a chawlh rih a ngai dawn a, chawlhkar li chhung a inkhel thei dawn lo a ni.

Kar tawp Premier League inkhel hmuhnawmah Ederson hi Liverpool nen an inhmachhawn ṭumin a inhliam a, striker Darwin Nunez nen ball an inchuhnaah intipalhin penalty a chawi zui bawk.

Brazilian player hi khelmual chhungah enkawl a nih hnuin thlak a ngai zui a, a hmun ruakah hian Stefan Ortega rawn lutin goal a chhuah lo, 1-1 in Reds nen an inhnehtawk a ni.

Man City hian tun thla tawp hian Etihad Stadium-ah EPL hmahruaitu Arsenal an mikhual dawn, inkhel pawimawh takah hian Ederson hi a inlan thei dawn lo.

Gunners bakah Newcastle United nen FA Cup quarterfinal-a an inkhelh hunah a inlan thei dawn lo, international break a awm zui dawn avangin kar li chhung chawl dawn mah se club tana match a khelh loh tur hi a tam hran lo.

Ederson awm loh chhung chu kum 31 mi Ortega kan hmu thung ang. German goalkeeper hian kum 2022 khan an ram club Arminia Bielefeld aṭangin City hi a zawm - Citizens tan hian vawi ruk a inlan tawh a ni.