Sevilla an fuh hleithei lo

Tun season-a vawi thum zet Coach thlak tawh Sevilla an che fuh hleithei lo - Thawhṭanni zan khan La Liga table mawngphah luahtu Almeria an lenchilh a, 2-2 in an inhnehtawk.

Almeria hian minute 38-naah Adrián Embarba hmangin goal hmahruai an khung hial a, chakpui tura inngaihna an nei hman. Mahse, beisei ang erawhin a kal lo - Sevilla hian minute 80 hnu lamah Dodi Lukébakio leh Lucas Ocampos hmangin an chhanglet a, 2-1 a ni daih!

Tun season-a chak la nei miah lo Almeria dinhmun a ṭha lo a, hnual phah nan erawh an hmang duh lo. Hun pek belh minute nganaah Marko Milovanovic chuan si phurh a sut ve leh a, 2-2 in inkhel a tawp.

Sevilla hian February-ah khan league match li khelin vawi khat chiah an tlawm a, vawi hnih chakin, vawi khat draw an nei. March-a an match hmasa berah Real Sociedad chu 3-2 in an hneh zui a, an insiamṭha ta anga ngaihna a lian hman.

Mahse, team tenau Almeria khelmualah an chak zo lo leh ta a, table-ah 14-na an ni. League match 28 an khelh tawhah relegation zone-a awm chin Cadiz aia an sanna chu point ruk chauh a ni a, an la him lo.