David Raya awmna Arsenal an chak

Thil vang deuh hi a hlu ṭhin, ṭhenkhat chu a lo thlen khat vanga hlu zual bik riau hi a awm bawk - Arsenal chuan ṭhangkhat lian zet an nghah hnuah Champions League quarterfinal an lut leh ta, inkhelh bana an lawmna khan an boruak chu a hrilhfiah.

Emirates Stadium-a inkhelah Gunners tan Leandro Trossard-a'n goal awmchhun khungin 1-0 in hun a tawp, extra time khelh zawh hnuah pawh goal dang a lut zui lo. Last 16 first leg-ah Porto 1-0 in an lo chak ve thung, inkhel pahnih belhkhawmah 1-1 a ni.

Penalty shootout hmanga chak zawk zawn niin, a pet hmasatu Arsenal tan Martin Odegaard, Kai Havertz, Bukayo Saka leh Declan Rice ten an khung vek. Gunners goalkeeper David Raya chuan Wendell leh Galeno te pet dansakin 4-2 in an chak.

Goal khat

Porto khelmuala an intawn ṭumin hun tawp dawna Galeno-a goal hmangin Mikel Arteta naute an chak lo. North London club hian kum 2010 hnu lamah UCL quarterfinal an la lut leh lo a, second leg khelh hmain Arteta-a'n player mai bakah fans chu theihtawp chhuah turin a ngen.

Thawhlehni zan inkhelah boruak a nung hle. Mahse, kum 41 mi Pepe hoa khel Porto tlarhnung an khawng ṭha viau a, boruak leh leiah an chesual duh lo, hun rei tak chhung chu Arsenal goal nawr na tak an dangchat.

Chawlhlawk hma deuhin tlan tam leh taima tak Odegaard chuan player pathum karah ball fing a pe lut a, a dawngtu Trossard chuan box sir deuh aṭangin goalkeeper Diogo Costa dan hman lohin a kilah a khung.

Gunners captain Odegaard-a'n a hnuah goal tawih zet mai a khung zui. Mahse, goal luh hma hian defender khawng tak Pepe lakah Havertz chu a lo 'foul' zauh a, lawm viau mah se an goal hnihna hi hnawlsak an ni.

Arsenal si ban nghak Raya khan tih tur nei lo a ni bik lo. Portuguese club lamin Evanilson leh Francisco Conceicao te hmanga an vuak letna chu a lo dansak a. Tun season UCL match anmahni khelmuala an khelh hoa goal an chhuah loh zel chhan a ni.

Bukayo Saka-a shot ṭha tak chu Porto keeper Costa-a'n a lo dang hram, ball per hi Odegaard zawnah kalin Norway internatonal midfielder hian goal ban hrulah a pet chhuak, goal dang lut zui loin 1-1 in an inhnehtawk.

Penalty dangtu Raya

Inhnehtawk a awm thei tawh si lo, penalty hi chu vanneih tel a ngai tawh. A pet hmasa bertu Odegaard-a'n goal kilah a pet a, a goal khung hi lawmin goal hnunga fan awmkhawm chu thawm na tak chhuah turin a au phur zui.

Porto lamin UCL tawnhriat nei ṭha Pepe rawn pen chhuahtir hmasa berin a khung chiang viau bawk. Mahse, a hnu lamah Raya-a'n Wendell-a pet chu lo kawih fuhin goal ban a per a, a vawi lina pettu Galeno chhuih chu a lo dansak.

Arsenal tana si ban nghaktu Raya bakah a pettu Havertz, Saka leh Rice te tan goal hnunga fans sahawk chu puitu ṭha tak an nih laiin, an khingpui Porto tan erawh anchhia a ni a, an tum ram thleng zo loin an zinkawng a tawp phah ta a ni.

Arteta chuan, "David Raya chet dan hian kan hnen a rawn pan tirh aṭang khan min hneh viau. A chet dan phung leh thutlukna a siam dan te hi a fuh ṭhin hle, goalkeeper ṭhain a neih tur ang hi a nei," tiin Spanish goalkeeper a fak hle.

Raya hi Aaron Ramsdale nen khaikhin a ni ṭhin - Arsenal ṭantu zingah pawh Ramsdale duhzawk an awm, mahse coach Arteta-a'n a thlan zawk erawh a chiang, Inkhelh banah English keeper hian Raya hi lawmpuiin a va kuah a, an borauk a ṭha.

Arsenal hi FA Cup aṭangin an tla tawh a, tunah chuan Premier League leh UCL chauh khelh tur an nei. Tun thla tawpah Manchester City nen an inkhel dawn, chumi hma chuan match khelh tur an nei tawh rih lo - international break erawh a karlakah a awm dawn a ni.

Porto coach lungawi lo

Inkhelh banah khelmual sir lamah thawm a awm zui a, coach pahnih an inchibai lo. Porto coach Sergio Conceicao chuan an khingpui Mikel Arteta chuan a chhungte chu ṭawngkam mawi lo takin a sawisak niin a sawi.

Conceicao chuan,"Arteta khan Spanish ṭawng hmangin bench lama ṭhute kha min ṭawngkhum, tah chuan ka chhungte a sawichhia a ni. Ani kha chuan team khelh dan a ngaihtuah mai tur a ni," tiin Arteta chu a kuang lo nawrah a puh.

Mahse, Gunners thupuangtu pakhat, a hming tarlan loh erawh chuan an manager hian ṭawngkam mawi lo a hman loh thu leh, huat tur thil a tih loh thu a sawi ve thung. Arteta pawhin hemi chungchang hi sawi tur a neih loh thu a sawi ve thung a ni.

Quarterfinal chungchang sawiin Arteta chuan, "A thiam pariat zinga tel hi kan thil tum hmasa kha a ni a, dawhthei taka kan nghah chu a takin a lo thleng. He hun thleng tur hian thi leh thau pawlhin kan bei," tiin a sawi.