Aizawl khaw pawn beiseina siamtu Kawnpui

Mahindra XUV 300 LPS Cup 2024 semifinal-ah Kawnpui Joint VC chiah Aizawl khaw pawn team aṭanga dam awmchhun an ni tawh. Nimin tlai khan Kawnpui hian Armed Veng chu 1-0 in an hneh a, nomawi chawi thiam coach, K. Malsawmkima enkawl team hian semifinal-ah nizana Ramhlun South leh Vaivakawn inkhela chak zawk an hmachhawn ang.

Aizawl District DFA buatsaih inelna hi Aizawl District huamchhung inelna a nih rualin MFA-in a phalsak angin sawm bik pali Sialhawk, Keifang Jt, Thenzawl Jt leh Kawnpui Jt te an tel.

Bethlehem Vengthlangin khelmual pawn leh chhunga thawm nei ring Sialhawk beiseina an titawp a, Thenzawl Joint pawhin Sihphir Venghlun an ngam lo. Keifang Joint-in beiseina sang tak nei mah se, Lalruatliana Sailo enkawl Vaivakawn lakah an beiseina a thamral. Tunah chuan sawm bik pali aṭangin Kawnpui Joint chiah an dam tawh.

Team 62 telna inelnaah hian Kawnpui hi match hmasa berah an bye a, last 32-ah Ramhlun Sports Complex 4-1 in an sawp. Last 16-ah champion rinkai zinga tel pha Salem Veng chu extra time-ah 3-1 in an hneh leh bawk.

Tun ṭuma an hneh Armed Veng hi tualchhung football inelnaa record nei ṭha an ni a, Central YMA Football-ah vawi nga champion tawhin nomawi chawi ngun ber an nih bakah ADFA hnuai inelna NECS Cup-ah vawi hnih an champion tawh. Veng/khua inelnaa team ropui Armed Veng hian second half-ah Kawnpui khaw chhuak leh MPL10 best player H. Lalbiakthanga an chhawr chungin Kawnpui an hneh lo.

Chutihrualin Armed Veng hian quarterfinal-ah re-inforce player an chhawr lo a, player inlante hi vengchhung mi vek an ni. Kawnpui erawh joint VC an nih bakah khaw pawn player lak Lalkrossmawia (Lawngtlai), Jehova Lalthangsanga (Churanchanpur) leh Lalrintluanga (Hnahthial) ten bul an ṭan vek a, Santosh Trophy-a Mizoram midfielder Lalengmawia an chhawr theih tawh bawk avangin inkhelh hmain rinkai an ni zawk.

First half-ah Kawnpuiin inkhel an thunun zawk a, Mawitea hmangin minute 18-naah an khung. Armed Veng captain Lalbiakhlua'n (Hlutea) Kawnpui tlarhnung tan harsatna siam bawk mah se goal a keng tel lo. Second half-ah Armed Vengin midfielder BT-a an luhtir a, goal mamawh zawk an nih bawk avangin inkhel an thunun a, goal khung tur striker hriam an nei lo thung.

National Games-a Mizoram champion pui tawhtu coach Mala'n tlarhnung a tiphui ṭha a, 1-0 chauh a ni chungin hun tawp lama harsatna hranpa tawk loin hnehna an chang. Kawnpui hian LPS Cup nomawi hmasa ber chu Aizawl District pawna chhuahpui ngei an tum ruh hle.