Zaninah AFC vs Gokulam; Mohammedan tan Mizo

I League-ah Mizo club Aizawl FC-in result ṭha neih harsat mah se Mizo player-te erawhin hming an la chher zel. Mohammedan SC chuan March 12, Thawhlehni zan khan Churchill Brothers 3-2 in an hneh a, chakna goal khungtu hi Mizo tlangval Lalremsanga Fanai a ni.

Mohammedan hian match 19 aṭangin point 44 an hmu a, anmahni hnaih bertu Sreenidi Deccan aiin point riatin an hmu tam zawk. Mizo club erawh kumina an chet ṭhat loh avangin match 17 aṭangin point 21 chauh an la hmu thung.

Zanin dar 7:00 hian Aizawl FC hian EMS Stadium-ah a sang pali zinga tel pha Gokulam Kerala an hmachhawn dawn a, hmabak a harsa dawn hle. AFC coach lailawk B. Malsawmzuala chuan, "Kan dinhmun siam ṭha turin Gokulam laka point hmuh hrim hrim hi a pawimawh a, hnehna kan chang thei a nih phei chuan player-ten inrintawkna an nei let leh thei ang," tiin Vanglaini a hrilh.

Aizawl FC hian kuminah team enkawl turin Bobi Stojkoski an lalut a, North Macedonia aṭanga Mizo club rawn enkawltu hian result ṭha a neih loh avangin an ban. Nikum lama result ṭha neitu coach Sawmtea chungah rinna an nghat a, tun dinhmunah erawh Sawmtea pawhin result ṭha neih a harsat - match hnuhnung pathumah point khat chiah an hlawh chhuak.