LPS Cup: Sihphir Venghlun an chak nuamsa

Mahindra XUV 300 LPS Cup 2024 semifinal lut pathum a hriat ta a, nizana Ramhlun South leh Vaivakawn inkhel result erawh kan hre hman lo - Thawhlehni zan khan Aizawl pawn aṭanga sawm bik Thenzawlin beiseina sang tak nei mah se, Sihphir Venghlun an tawng a, 4-0 ngawtin an tlawm!

Round of 16-ah Thenzawl hian tualchhung football-a hming langsar Dinthar chu 5-2 ngawtin an la sawp thei a, player an inkhairual ṭhat bawk avangin quarterfinal-ah pawh beiseina an nei sang hle.

Mahse, last 16-a team ṭha Republic Veng pet chhuaktu Sihphir Venghlun an duai bik lo a, Thenzawl lakah zahngaihna an lantir lo - Sihphir tan hian Ricky Lalramnghaka chu player langsar niin, hattrick a siam a, Sihphirin goal khungpui mamawh lo mah se, Thenzawl player Lalhruaichhunga chuan an lamah a tilut bawk.

Aizawl DFA-in a sawm bik zinga mi Thenzawlin a chhanletna tur an neih loh avangin an nomawi beiseina a thamral zui a, Sihphir Venghlunin a thiam pali zinga tel turin an hming an ziak kai ta thung.

LPS Cup quarterfinal match hmasa berah Bethlehem Vengthlang chuan thawm nei na tak Sialhawk chu an lo hneh tawh bawk a, team pahnih hi hun pangngaiah goal khung loin an inhnehtawk a, extra time khelh hnuah pawh thawnthu a danglam lo.

Penalty hmangin chak zawk zawn zui a ni a, BVT-in tawnhriat nei ṭha an nihna boruak sangah pholangin, penalty hmangin 5-3 in an chak a, semifinal an lut. BVT hian semifinal-ah anmahni ang bawka First Division club nei veng Sihphir Venghlun an hmachhawn ang.