Klopp-a tel lohna Liverpool an din ṭan!

Liverpool coach ropui leh fan te atchilh rawn Jurgen Klopp-a'n season tawpah Anfield a chhuahsan tur thu a sawi chiang a, Reds ṭantu tam takin German coach tel loa an team che vel tur chu an mitthla thiam lo.

Klopp hian Reds-ah nomawi chawi theih ang chu a chawi kim - Premier League, FA Cup, League Cup (2), FA Community Shield, Champions League, UEFA Super Cup leh FIFA Club World Cup-ah te champion nomawi a chawipui vek!

Tun season-ah League Cup an champion fel der tawh a, Premier League, FA Cup leh Europa League-ah te champion an la beisei vek bawk - Europa League-ah hian round of 16 second leg chu zanin dar 1:30 hian an khel dawn a, Sparta Prague an mikhual dawn.

Reds hian first leg-ah 5-1 ngawta hnehna an chan avangin Czech club ṭha tan Anfield-ah comeback beisei a harsain a rinawm a, Klopp hian nomawi pali nen a season tawp ber hi a khar lo ang tih a sawi theih loh.

A bul ṭanna

Liverpool ṭantuten, "Tuin nge Jurgen Klopp thlak ta ang?" tiin mangang takin an inzawt a, German coach hian 'gegenpressing' a tih te, 'heavy metal football' a tihte hmangin 'team' a din a, he Liverpool hi ama hlimthlaa a duan a nih miau avangin Klopp thlak a harsa dawn tih a chiang.

Hetihlai hian lang lo phenah Liverpool neitu Fenway Sports Group te chu rim takin an thawk a, Bayer Leverkusen boss Xabi Alonso, Brighton & Hove Albion coach Roberto De Zerbi leh Sporting Lisbon boss Rúben Amorim te hming a ri ring hle.

Mahse, FSG hian Klopp-a thlak tur aiin ngaih pawimawh hmasak an nei a, chu chu tun hnaia an hlawhtlin theih nana thawhhlawk tak, kum 2022-a chhuahsantu, an club sporting director hlui Michael Edwards hruai kir a ni!

Tun hnaia Liverpool ropui chhanah Klopp chu langsar ber ni mah se, a phena mi pawimawh chu Michael Edwards a ni a, transfer leh thil dangah a hriam ṭhin hle. Klopp ber a chhuak dawn ta bawk si a, FSG-in hruai kir ngei an duh a, Klopp chhuah hnua indinthar bul ṭan nan an duh.

A kir ta

FSG hian January khan Edwards hi kir turin an lo thlem tawh a, mahse, an dawrna hmasa a hnar. Tun hnaiah uluk zawkin, ngaihtuahna fim nen an rim ṭha leh a, 'Di hlui' lakah Edwards a ṭang zo lo a, a tlu ta!

Liverpool hian official takin Edwards-a hna tur ber hi puanzarna la nei lo mah se, FSG hnuaiah CEO of football a ni dawn niin khawthlang media-te chuan an tarlang a, Liverpool Sporting Director thar leh Klopp thlaktu tur zawngin ngaihtuahna a seng nghal ang.

Kum 44 mi Edwards hian FSG president ni lai Mike Gordon-a hna chanpual ṭhenkhat a la dawn niin an sawi a, tun hma zawng aia thu turin Reds-ah a kir dawn a ni ber. Liverpool hi January khan sporting director Jorg Schmadtke chuan a chhuahsan a, a hmun ruak luahtu tur an la nei lo.

Reds hi Bournemouth technical director Richard Hughes nen sawizawm an ni a, Richard Hughes hian season tawp ruala Cherries hi a chhuahsan dawn avangin Liverpool-ah hian a luh ngei a rinawm hle.

Beiseina

Klopp an chân dawn avangin Reds fans an ngui a, chutihrual chuan Edwards-a kir tur hian beiseina tam tak a siamsak ang. FSG CEO (football) thar chuan, "FSG-in thawhpui atana min duhna hian min hneh hle.

"Ka lo kir a nih chuan, rilru leh ngaihtuahna thar nen, thatho taka lo kir hi ka duh dan sa a ni a, chumi awmzia chu chona thar hmachhawn ka châk tihna a ni. He club-in ṭhan zel a duhna hian lo kir turin min hneh a, hlawhtling tur chuan sum tam tak sen a, ngaihtuahna thar sen fo hi a ṭul a ni," a ti.

Edwards hian Reds-ah kum 10 zet hun a lo hmang tawh a, Liverpool hi a hrechiang tawk. Anfield a chhuahsan khan club hrang hrang aṭangin sawmna a dawng nual a, Manchester United leh Chelsea pawh sawmtu zingah an tel.

Mahse, heng sawmnate hi a hnar vek a, Liverpool-a director of research ni ṭhin Ian Graham-a din sports advisory business Ludonautics-ah consultant-in a thawk a, he hna hi bansanin Anfield-ah bawk a kir leh ta.

Hmabak

Edwards-a tan Sporting Director hi chu zawn hmuh mai theih a ni dawn a, Richard Hughes chu an lakluh fel mai a rinawm. A harsa lai ber chu Klopp thlak zotu tur zawn hi a ni - Alonso chu Reds duh ber a ni ang tih a chiang a, mahse, Bayern Munich leh Barcelona pawhin an duh ve nia sawi a nih avangin a chan a awlsam dawn lo.

Liverpool player hlui a nih avangin Kop hoin thinlung takin Alonso hi an pawm nghal dawn. Season 11 zet Bayern champion zawn tawhna Bundesliga-ah Leverkusen chu point 10 ngawtin hma a hruai falpui mek a, Europa League last 16 a hruai thleng bawk. Mahse, first leg-ah Qarabag chu 2-2 in an inhnehtawkpui hram a, zanin dar 1:30-ah second leg an khel ang.

Reds nena sawizawm dang De Zerbi-a'n Europa League last 16-ah Brighton a hruai thleng a, mahse, first leg-ah 4-0 ngawtin AS Roma an ngam lo. Zanin dar 1:30-ah second leg an khel dawn a, Italian club laka an chet danin Liverpool thuneitute rilruah thui takin thu a sawi a rinawm.

Lisbon coach Amorim hi kum 39 lek ni mah se, a sulhnu a ropui hle. Braga chu Taca da Liga-ah vawi khat a champion pui tawh a, Lisbon tan Primeira Liga, Taca da Liga (2) leh Supertaça Cândido de Oliveira nomawi a chawi tawh bawk. Anni pawh Europa League last 16 an lut a, first leg-a 1-1 a an inhnehtawkpui Atalanta chu zanin dar 1:30-ah an lenchilh ang.