Kum li hnuah Barca-in UCL quarterfinal an lut

Barcelona-in Italian champion Napoli lakah 3-1 a hnehna changin kum li hnuah UEFA Champions League quarterfinal an lut. Stadio Diego Armando Maradona-ah team pahnih hi 1-1 in an inhnehtawk a, Estadi de Montjuic-ah Catalan club an chungnung ta thung.

Thawhlehni zan inkhelah Barca tan Fermin Lopez leh Joao Cancelo ten goal an khung a, Napoli-in Amir Rrahmani hmangin sut ṭhen mah se Catalan club tan Robert Lewandowski-a'n chak nemnghehna goal a khung.

Goal hnih a hlu

Europe club lian pahnih inkhel a nung ṭha a, goal chance hmuh tur pawh a tam. Italian club Victor Osimhen-a'n chance ṭha a hloh a, Barca pawhin goal khung theihna chance an nei ve tho.

Mahse, Barca-in minute hnih chhung lekin goal hnih an khung a, vawi leh khatah dinhmun ṭha takah an ding. Minute 15-naah Raphinha cross chu Lewandowski-a'n fing taka lo kian zeuhin Fermín Lopez-a'n chiang zetin a khung. Spanish midfielder Fermin hi kum 20 mi chauh a ni.

Napoli an insiamṭhat hmain Barca-in an khung lehnghal a, minute 17-naah Raphinha ball pet chuan goal ban a per a, hemi per hi Cancelo-a'n a khung.

Inkhel a nung zel

Catalan club dinhmun ṭha hman mah se Napoli-in an vaw let. Minute 30-naah dinglam aṭanga Matteo Politano ball pek let chu Napoli defender Amir Rrahmani-a'n goal kilah a dah - striker ṭha mi tih atana mawi a ni. Barca keeper Marc-Andre ter Stegen a che ṭha a, Germany international keeper hian Giovanni di Lorenzo ball tauh ṭha zet chu a nam chhuak.

Second half-ah Napoli-in na takin an nawr chhunzawm a, Xavi-a'n goal neih venhim a pawimawh tih hriain tawnhriat nei ngah zawk Oriol Romeu leh Sergi Roberto te a dah lut. Italian club-in chance ṭha insiam an harsat a, Barca rawlthar duhawm Lamine Yamal-a'n goal khung belhah inngai mah se offside vangin pawm a ni lo.

Minute 83-naah Ilkay Gundogan-a ball fing chu Sergio Roberto-a'n box chhungah changin Roberto hian pe let lehin Lewandowski-a'n goal ruakah a khung. Lewy a hunah tak a rawn inlar a, hun tawp lamah harsatna hranpa tawk tawh loin Barca-in hnehna an chang.

Player chhertu Barca

Barcelona hian player lakluh nan sum hmang tam bawk mah se player ṭha an chher ve reng. Napoli laka bul ṭantu kum 16 mi Lamine Yamal, kum 17 mi Pau Cubarsí leh kum 20 mi Fermín López te hi La Masia chhuak vek an ni.

Xavi-a'n tawnhriat nei ṭha player karah player naupang zawk a chhawr ngam a; Cubarsi, Fermin leh Yamal ten theihna an neih san bawk avangin club hmabak a ên phah hle.

Barca hian Napoli lakah hian kum 21 mi Pedri inhliam vangin an chhawr thei lo a, kum 19 mi Gavi pawh inhliam vangin a la inekawl a ṭul. Lionel Messi chher chhuaktu Barca-in player ṭha an chher chho leh mek a, Messi anga ṭha chher chhuah a theih tawh loh pawhin Champions League nomawi chawi theitu chherchhuah erawh thil theih a ni thung.