NorthEast Oympic Football-a Mizoram aiawh tur a hriat ta

NorthEast Olympic football-ah Mizoram chu champion lai an ni a, chutihrualin nikuma Meghalaya-a inelna neih a nih khan kum 21 hnuai lam inelna a ni. Kuminah erawh football hi senior team inelna a ni dawn a, MFA chuan MPL10 champion Mizoram Police behchhanin team a din.

Mizoram team hi All India Police Meet leh MPL10-a Mizoram Police champion puitu coach Lalbiaksanga Colney-a'n a enkawl dawn a, Santosh Trophy neih zawh taka Mizoram team-a Police player parukte koh vek an ni.

NorthEast Olympic-ah hian player 18 koh theih a ni a, MPL10-a Police player 15 thlan an ni a; Chanmari FC, Chawnpui FC leh Chhinga Veng FC aṭangin player pakhat ṭheuh thlan an ni bawk.

Chawnpui FC innghahna Vanlalthanga chu Santosh Trophy final round-a koh a nih loh hnuah thlan zingah a tel a; Ramngaihsanga chu a vawi khat nan Mizoram senior team-ah koh a ni. Isak Malsawmkima erawh Manipur-a Santosh Trophy-a qualifying round khelh a nih ṭum khan squad-ah a tel tawh thung.

NorthEast Olympic vawi thumna hi Nagaland-in a thleng dawn a, inelna hi March 18-23, 2024 chhunga neih tur a ni.